A Estrada, 26 de agosto do 2020 – A primeira edición de Solpores no Lagoeiro chega ao seu ecuador coa música de Fredi Leis e Tanxugueiras.
A Casa do Lagoeiro, da que podes saber algo máis en esta reportaxe, acolle mañá xoves nos Solpores ao cantautor compostelano Fredi Leis a partir das nove media da noite. Será nun concerto acústico no que o artista, que aposta “pola música sen etiquetas nin barreiras”, dará a coñecer os temas do seu disco Neón, un traballo que conta con pezas como Mariposas, Sálvate ou Quiero Darte.
Xa o domingo, a partir das nove, Tanxugueiras, o trío conformado por Sabela Maneiro, Aida Tarrío e Olaia Maneiro, presentará Contrapunto, o seu segundo traballo discográfico. Trátase dun disco que, a modo de espello, presenta dez creacións sobre as cuestións positivas e negativas da vida. Cinco vivencias enfrontadas a outras tantas nas que as coplas tradicionais son revisionadas dun xeito moi especial.
As dúas propostas serán a ceo aberto e durante o seu desenvolvemento o servizo do Restaurante do Lagoeiro atenderá ao público, sentado por unidade de convivencia, nas súas mesas
As entradas para os concertos de Fredi Leis e Tanxugueiras están dispoñibles a través da plataforma web Enterticket. De cara ao mes de setembro, Solpores no Lagoeiro programa os dous últimos espectáculos da súa primeira edición. O domingo 6 será a quenda de Xoel López
en formato cuarteto, nun concerto que ten as entradas practicamente esgotadas. Xa na semana seguinte, o sábado 12, o cómico Goyo Jiménez presentará Confusio, unha recompilacion dos seus mellores monólogos coa que se pechará o ciclo. Os billetes para esta última actuación pódense adquirir, unicamente, de forma presencial en A Casa do Lagoeiro, O Camiño (A Estrada), A Senra Café (Teo) e Ollo de Boi (Portonovo). Para aquelas persoas que non se poidan desprazar fisicamente a algún destes espazos, A Casa do Lagoeiro habilita un número de teléfono (690.212.767) para poder facer a reserva previa das mesmas.