Bisbarra, 21 de xullo do 2022 – Os concellos do Barbanza e Porto do Son reuníronse con representantes da Dirección Xeral de Mobilidade para buscar a mellora do transporte na zona.
Por parte do organismo autonómico participaron o director xeral de Mobilidade, Ignacio Maestro, e o xefe territorial da Consellería de Infraestruturas e Mobilidade na provincia da Coruña, José Antonio Álvarez. Por parte dos concellos estiveron presentes San Caetano o alcalde de Porto do Son, Luís Oujo; de Rianxo, Adolfo Muíños; de Ribeira, Manuel Ruiz; e a xerente da Mancomunidade Barbanza Arousa, Fátima Cachafeiro ademais de representantes da empresa concesionaria do transporte público.
O encontro dá continuidade ao mantido o pasado mes de outubro no que os representantes municipais quedaron emprazados a trasladar as súas achegas para unha proposta de reestruturación dos servizos formulada pola empresa concesionaria.
No novo deseño presentado a compañía analizou e tivo en conta as enquisas realizadas polos concellos entre a veciñanza para coñecer de primeira man as necesidades dos usuarios. De aí sae unha proposta de que prevé unha redución dos tempos de viaxe con Santiago de Compostela e a mellora das conexións na bisbarra.
A configuración deseñada inclúe crear servizos directos entre Ribeira e Santiago de Compostela cunha duración estimada en 60 minutos, que estarían conectados co resto de localidades do Barbanza a través de 3 liñas lanzadeira. Outros servizos serían semidirectos, por estrada entre Ribeira e A Ponte de Té, no concello de Rianxo, continuando cara a Santiago de Compostela por autoestrada.
A oferta de servizos da conexión coa capital galega completaríase con liñas por estrada con itinerario por Padrón ou por Noia, atendendo deste xeito tamén ao concello de Porto do Son.
A reestruturación destes servizos acompáñase dunha mellora das comunicacións entre as poboacións da comarca do Barbanza a través das liñas que atenden o traxecto parcial entre Ribeira e Boiro por estrada.
A nova proposta de transporte recolle tamén as posibilidades de axustar a oferta segundo a evolución da demanda ao longo do ano. Máis en detalle, tense en conta que existen liñas que rexistran un pico de usuarios no verán e valórase mellorar a oferta durante as festividades.
Agora este deseño será avaliado máis polo miúdo pola Dirección Xeral de Mobilidade e polos concellos do Barbanza e de Porto do Son para avanzar no reforzo do transporte público na bisbarra.