Rois, 1 de xuño do 2017 – A formación Xente de Rois ven de denunciar ante a Valedora do Pobo ao concello por non cumprir coa lei de transparencia.
Xente de Rois lembra que segundo a Lei 19/2013, de 9 de decembro, de transparencia, acceso á información pública e bo goberno, os concellos teñen que facilitar publicamente información sobre contratos municipais, contas públicas, retribucións dos cargos e outras cuestións polo estilo. Esta lei esixe que esta información, ademais de estar dispoñible nas dependencias municipais, tamén o estea na web. Para facilitar a posta ao día das diferentes administracións públicas, principalmente as locais, houbo unha moratoria de dous anos na súa aplicación, unha dilación do prazo que expirou o mes de xaneiro de 2016. Logo a partir desta data é unha lei de obrigado cumprimento.
Xente de Rois explica que preguntou pola aplicación de dita lei no Pleno Ordinario de 7 de xullo de 2016, cando pensaba axustarse a esta lei o equipo de goberno de Rois. Dita cuestión foi reiterada nos plenos de setembro e novembro do ano pasado e nos de marzo e maio de este 2017. Xente de Rois denuncia que aínda que a resposta sempre é que se está traballando no tema a realidade e que a lei non se aplica e polo tanto decidiron levar a cuestión ante a Valedora do Pobo que agora terá que decidir.