Compostela, 24 de abril do 2019 – O pasado mes de febreiro a Libraría de Mulleres Lila de Lilith acolleu a presentación de Vermella de Sabela Losada Cortizas, unha publicación de Baia Edicións que saca á luz un tema tabú e pouco tratado na literatura infantil, como é o da menstruación desde unha perspectiva de indagación case que policial e de divertimento por parte da rapazada protagonista.
Vermella consegue manter a súa intriga, mesmo coa axuda de trazos do humor natural característico do mundo infantil, na procura da orixe do móbil da investigación, que lle dá sentido á trama e que ten que ver coa propia e progresiva descuberta do corpo da nena.
Cando Flor atopa unhas pingas de sangue no cuarto de baño comeza, xunto con Leo, a investigación de tan estraño suceso… Foi un accidente?
Quen é a vítima?
Serán quen de resolveren este enigma?
Sabela Losada
Nada en Compostela, é experta en xénero, cooperación para o desenvolvemento e xestión cultural. Aos vinte anos marchou a América Latina onde traballou para a cooperación galega, CIDEAL e a AECID, ademais de colaborar con organizacións de mulleres e os Festivais de Cine de Dereitos Humanos e de Cine Ambiental de Arxentina.
É a creadora de Dalúa Libros onde ten publicado varios volumes para crianzas e foi premiada no Certame Internacional Encarna León polo seu relato sobre a relación entre Rosalía de Castro e María Cardarelly, autora das súas primeiras fotografías.
Foi parte de Mulheres Livres e outros colectivos, e ten escrito sobre rebelións populares en América do Sur, identidade e autocoñecemento feminista, maternidade, crianza e educación libres.
É nai de dous fillos e leva máis de quince anos vivindo arredor do océano Atlántico.
Vermella
Gañadora ex aequo do I Premio Fina Casalderrey de Literatura Infantil pola Igualdade (2018) e ilustrada por Minia Regos. Segundo o tribunal, Vermella saca á luz un tema tabú e pouco tratado na literatura infantil, como é o da menstruación desde unha perspectiva de indagación case que policial e de divertimento por parte da rapazada protagonista.
Conversando coa autora
Lindeiros falou con Sabela para que nos contara algo máis sobre como nace este libro. O obxectivo era conseguir algo que puideran ler nenos e nenas, normalizar a mestruación para todos
A escritora fai unha reflexión moi interesante sobre o sangue, parece que exista unha boa e outra mala, unha que se pode mostrar e outra que é preciso agochar
O libro é tamén unha interesante ferramenta para os pais, un xeito de explicar algo que as veces, por descoñecemento, pode causar medo
Unha interesante obra e unha máis interesante autora nunha preciosa edición de Baia recomendable non só ara cativos, para todo o mundo.
