Bisbarra, 2 de maio do 2023 – O pasado venres era aprobado pola Deputación o proxecto de mellora da seguridade vial de dúas estradas no concello de Vedra.
Trátase das estradas DP-8203, de Vedra á ponte de Santa Lucía en San Xián de Sales; e a DP-1202, no tramo de Trobe a Mesón do Mareque. Os proxectos contan cun orzamento de 262.499 euros.
O proxecto contempla a mellora da seguridade vial nas estradas mencionadas, para o que será necesario aumentar a sinalización tanto vertical como horizontal, incluíndo bandas transversais de alerta, sinais de perigo peonís e de velocidade máxima de circulación. Na zona de San Xián de Sales engadirase un tramo na marxe esquerda da estrada de senda peonil e de aparcamento en liña de forma que se garanta a seguridade dos peóns ao circular por ditos tramos.
A senda peonil construirase a nivel, cunha separación do aparcamento mediante delimitadores de caucho reciclado. Debido a que o noiro resultante do movemento de terras é maior que o espazo dispoñible expropiado, plantexarase a execución dun muro de dique.
