Bisbarra, 25 de abril do 2024 – O concello de Vedra segue participando de proxectos europeos de desenvolvemento do rural e ven de asistir en Bruselas ao remate do proxecto Elabhause.rur.
Elabhause.rur é un proxecto liderado pola Asociación Galega de Cooperativas Agrarias, AGACA, da que Vedra é socio. Unha iniciativa que naceu inspirada pola filosofía da Nova Bauhaus Europea (NEB).
NEB é un termo adoptado pola Comisión europea para definir unha forma de entender os espazos do futuro como unha conexión entre medio ambiente, economía circular e cultura. O obxectivo é crear cidades máis sostibles, máis inclusivas, máis dixitais e esteticamente máis fermosas.
Durante dous anos de traballo os catro países participantes puideron compartir boas prácticas e crear espazos de debate para camiñar cara eses territorios rurais que compartan os valores da NEB.
Coincidindo co Festival da Nova Bauhaus organizado pola Comisión Europea en Bruxelas, celebrouse nesta cidade este último evento do Elabhause.rur o que permitiu aos prepresentantes de Vedra coñecer de primeira man o traballo que se está realizando noutros territorios europeos para acadar os valores promovidos dende a perspectiva da Nova Bauhaus.
Os participantes crearon ademais unha plataforma WIKI no que atopar máis información sobre a iniciativa e o traballo realizado. https://elabhause.eu/es/docs/elabhause-wikiplatform/
