Bisbarra, 4 de xullo do 2022 – Un total de 141 rapaces e rapazas de Boqueixón e Vedra, de idades comprendidas entre os 9 e os 16 anos, participaron durante esta semana nos Campamentos de Verán 2022.
Os campamentos, organizados conxuntamente por Vedra e Boqueixón, serviron como medida de conciliación familiar e ofreceron aos mozos a participación en actividades educativas e de tempo libre durante os primeiros días de vacacións escolares.
Os campamentos tiveron lugar nas Rías Baixas. A rapazada de Vedra e Boqueixón distribuíuse en dous grupos: infantil (para nenos e nenas entre 9 e 12 anos) e xuvenil (rapaces e rapazas de entre 13 e 16 anos). Durante estes días, desfrutaron de todo tipo de actividades acuáticas, multiaventura, culturais e de natureza
Intercambio xuvenil
A maiores, este ano contouse coa participación doutros 25 mozos e mozas chegados de Ibiza, de entre 16 e 18 anos de idade, e que forman parte dun intercambio acordado entre os Concellos de Boqueixón, Vedra e Ibiza. Estas 25 persoas, acompañadas por dous monitores, aproveitaron para coñecer os dous municipios galegos, así como algúns dos puntos máis importantes da comunidade. Esta visita é a antesala da viaxe que unha trintena de mozos e mozas fará a Ibiza desde mañá e ata o 12 de xullo.
