Valentín García, Secretario Xeral de Política Lingüística, participa nas aulas dixitais

Compostela, 8 de febreiro do 2021 – O secretario xeral de Política Lingüística, Valentín García, participou por videoconferencia no programa Aulas dixitais impulsado desde a Consellería de Cultura coa colaboración de Coca-Cola.

Valentín García abriu a primeira sesión cun encontro do escritor Mario Regueira co profesorado da XII edición do Concurso Novos Talentos de Relato Curto.

O responsable de Política Lingüística da Xunta salientou “a importancia desta iniciativa que vencella o ámbito escolar ao sistema literario galego e que contribúe á dinamización da lectura nas aulas superando as barreiras que nos impón a complexa situación que vivimos”

Valentín García felicitou tamén a Coca-Cola  por “manter o seu compromiso coa promoción do uso da lingua galega no ensino e achegar ás aulas escritoras e escritores que apostan polo idioma como ferramenta da súa creatividade artística e literaria”.

Achegar a literatura escrita en galego ás aulas

A través deste programa, Aulas dixitais, enmarcado na XII edición do Concurso Novos Talentos de Relato Curto organizado por Coca-Cola co apoio da Xunta, a compañía continúa colaborando co profesorado no obxectivo de plasmar a creatividade do alumnado galego nun relato. En total, Aulas dixitais contou os pasados xoves e venres cunha vintena de profesores de distintos centros de ensino galegos.

Os escritores Rosa Aneiros e Mario Regueira foron os encargados de dirixir os talleres do programa. A sesión do xoves correu a cargo de Regueira, quen compartiu as estratexias da narrativa nos últimos 50 anos e compartiu co profesorado estratexias para facer os textos máis atractivos, lúdicos e capaces de mesturarse con outros xéneros e eidos artísticos. Para rematar, Rosa Aneiros conduciu a sesión do venres a través de contidos centrados na estimulación lectora e creativa do alumnado e baseados na súa propia experiencia literaria.