Bisbarra, 2 de maio do 2024 – Val do Dubra obrigado a buscar novas estratexias contra o vertedoiro de Niveiro despois de recibir o oficio xudicial que o autoriza.
A sentencia xudicial confirma a compatibilidade urbanística do vertedoiro de Niveiro e obriga ao concello a autorizalo. Un documento que motivou unha reunión de urxencia entre o concello e a Plataforma veciñal creada para loitar contra o vertedoiro.
Na reunión participaron o alcalde Diego Luis Díaz, os voceiros do Concello; Carmen Vilacoba (PSOE), Antonio Negreira (Anova) e José Manuel Varela (PP); xunto con membros da “Asociación Medioambiental de Niveiro” e na que foron acordados os próximos pasos a seguir.
Por unha banda acordouse realizar novas mobilizacións á vez que se contará con apoio legal especializado que poida dar resposta nos futuros trámites.
Por outro lado quedou claro que a vía xudicial, aínda que resultou contraria, abriu tamén espazo para “explorar outras propostas especialmente no ámbito social”.
Tanto os representantes do Concello como os da plataforma manifestaron a súa determinación en buscar alternativas que dean visibilidade a este grave problema que afecta á toda a veciñanza do Concello e da contorna.
