Bisbarra, 16 de maio do 2024 – O BNG urxe á Consellería de Educación da Xunta de Galicia a que aproveite o período de vacacións para arranxar o CEIP Barrie de la Maza de Santa Comba.

O voceiro do BNG en Santa Comba, Juan David Sixto, e a Deputada Iria Carreira visitaron de novo o centro e insistiron en que “sería unha irresponsabilidade gravísima que non se solucionasen as eivas antes do inicio do novo curso”.

O portavoz nacionalista, Juan David Sixto, e a deputada no Parlamento Galego, Iria Carreira, visitaron de novo o CEIP Barrié de la Maza para se reunir con representantes da ANPA e comprobar de primeira man a situación que atravesa o centro con graves problemas de estado das instalacións.

Iria Carreira explicou que “Instamos á Xunta no Parlamento a que iniciase o proceso para un proxecto de reforma integral do centro educativo que, como podemos comprobar, é máis que necesaria mais, en todo caso, urximos de novo a que se aproveite o período vacacional para solucionar os problemas máis graves que afectan ás instalacións”.

Como puideron comprobar na visita, o CEIP Barrié de la Maza padece evidentes problemas de illamento, con xanelas de cristal único e en pésimas condicións, o que se agrava aínda máis cun sistema de calefacción insuficiente que no inverno no consegue alcanzar unha temperatura adecuada en certas dependencias como o propio ximnasio.

As demandas dos pais  están avaliadas por informes técnicos como os derivados dunha inspección de sanidade por humidades na cociña e no almacén que detectou riscos de intoxicación alimentaria e perigo eléctrico ademais dunha avaliación que instou a realizar actuacións de emerxencia en oito aulas e un aseo.

A falta de seguridade para o alumnado afecta tamén a outros espazos das instalacións como o patio de xogo que presenta estruturas de formigón romas e un areeiro  de cantería que non ten condicións para ser usado polas crianzas. Estes problemas súmanse a outras deficiencias como a falta de aseos para o alumnado, o espazo reducido do ximnasio e a biblioteca que obriga aos eu uso por quendas que indican a necesidade de modernización e mellora das instalacións.

Unanimidade nas demandas

Polo CEIP Barrie de la Maza de Santa Comba xa pasaron tanto Psoe como BNG, o equipo de goberno municipal xa mostrou o seu apoio e os país mostráronse dispostos a continuar coas mobilizacións o tempo que faga falta.

Polo momento no hay novas desde a Consellería de Educación polo que ou se afronta o problema xa, este mesmo verán como pide o BNG, ou o vindeiro curso as opcións son seguir cos mesmos problemas ou enfrontar un curso con obras no colexio.