Bisbarra, 16 de maio do 2024 – O Mosteiro de Carboeiro, en Silleda, ofrece mañá, Día das Letras Galegas, unha boa oportunidade de ser visitado ao organizar unha xornada de portas abertas.

Carboeiro adiantase deste xeito á xornada do Día dos Museos, que se celebra o sábado 18, xornada na que o mosteiro románico estará pechado ao público por mor do paso do Rallysprint Silleda polas estradas da zona. 

Na xornada do venres o público poderá desfrutar tamén do concerto Voces de Carboeiro (17:30), organizado polo Coro Vales Mahía e que nesta ocasión estará acompañado polas Coral Polifónica do Casino do Carballiño e o Orfeón de Voces Graves da Arousa.

O horario de visita ao mosteiro a día de hoxe é de 11:00 a 14.30 e de 16.30h a 19:00 horas. En canto se incorpore a nova persoa que se contratará como guía turístico a través da subvención da Deputación de Pontevedra (para atención do Punto de Información da Rede Info Rías Baixas), aplicarase o horario de verán con apertura ata máis tarde.

Máis de 1.360 visitas en abril

O Mosteiro de Carboeiro recibiu un total de 1366 visitas no pasado mes de abril. O perfil turístico neste mes foi moi similar ao que se vén rexistrando. A maioría foron mulleres maiores de 45 anos que coñecían o antigo cenobio ou facendo unha busca na rede, vírono e quixeron visitalo, achegándose no seu vehículo particular e coa familia ata o mesmo.

Unha pequena porcentaxe (15%) decidiu facer o Sendeiro do Deza que comunica a Fervenza da Toxa co Mosteiro e, polo tanto, chegaron a pé. En canto á orixe, a procedencia das visitas foi moi variada, como soe ser habitual. A porcentaxe máis alta foi a de persoas galegas (78%), as cales pertencían na súa maioría á provincia de A Coruña, máis concretamente as cidades de Santiago de Compostela (249 persoas) e A Coruña (123 persoas).

En canto ás visitas procedentes de España, non galegas, foron máis de 200 persoas procedentes sobre todo das comunidades de Madrid, Andalucía e Castela A Mancha. Finalmente, do estranxeiro achegáronse máis de 45 persoas procedentes de lugares como Portugal, Alemaña ou Arxentina.