Bisbarra, 24 de abril do 2024 – O proxecto eólico que ameazaba ao emprazamento denominado Castro Valente, entre os concellos de A Estrada e Padrón, ven de ser anulado cautelarmente polo Tribunal Superior de Xustiza de Galicia, TSXG.
A protección e posta en valor de Castro Valente é algo solicitado en distintas ocasións por partidos políticos e colectivos sociais e investigadores. A paralización do proxecto eólico era unha prioridade para a súa preservación.
O voceiro do BNG na Estrada, Xoán Reices. Lembra que “este parque eólico está situado enriba dos restos arqueolóxicos unha fortaleza medieval, o que, como xa manifestamos con anterioridade debería ser motivo abondo para anulalo definitivamente, de feito, o grave é que a Xunta, a pesar de todo, dese a autorización administrativa pertinente”
O concelleiro do BNG considera que a suspensión cautelar de Castro Valente pode ser unha boa noticia para toda a veciñanza que está loitando contra o parque eólico de Xesteiros, que quere construír Norvento nos montes de Vea.
Reices engade que “Hai que lembrar que Xesteiros e Castro Valente comparten a liña de evacuación, se un parque cae, cabe pensar que isto tamén pode repercutir na execución co segundo, mais imos ser prudentes e agardar acontecementos”.
Aínda pendentes da copia do recurso do concello
O BNG da Estrada segue tamén instando ao concello a que actúe de xeito máis contundente. Reíces di “instamos ao novo alcalde a que remita ao BNG a copia do recurso que presentou o concello o 22 de marzo contra a autorización administrativa previa do parque eólico de Xesteiros. Solicitámolo hai un mes e aínda hoxe non temos a copia solicitada que o ex-alcalde, José López, comprometeuse enviar no pleno que tivemos a principio de mes”.
O nacionalista engade que “Supoñemos que o alcalde, tanto o novo como o anterior, non teñen nada que agochar, mais esta demora non é comprensíbel, a pesar dos acontecementos dos últimos días”.
