Ordes, 29 de maio do 2017 – O equipo do Arzúa proclamouse vencedor do XX Trofeo Intermunicipal de Fútbol Sala, disputado na vila de Ordes e organizado polo Concello.
O 3 a 1 ante o Santa Comba, subcampión desta edición, valeulle para alzarse co máximo distintivo tras un emocionantísimo encontro que finalizou o seu tempo reglamentario cun empate a 2. Houbo que esperar á prorroga para saber cal era o nome do gañador deste ano.
O Ordes ocupou o tercerio lugar conxuntamente co Frades, completando así a táboa clasificatoria. Os anfitrións caeron derrotados por 3 a 4 en semifinais na ronda de penaltis ante un Santa Comba que saíu a por todas. Tamén destacou Rubén Palmeiro, do Trazo, que conseguiu o premio ao máximo goleador desta edición con 5 tantos encaixados.
Durante todo o día os pavillóns Castelao I e II acolleron a centenares de seguidores e xogadores, convertindo á vila ordense no punto de maior interese para os afeccionados a esta modalidade deportiva. En total congregáronse máis dun centenar de xogadores pertencentes a 10 equipos dos concellos de Trazo, Frades, Tordoia, Santa Comba, Touro, Negreira, Arzúa, Vedra, Teo e Ordes.
Tanto o alcalde de Ordes como a concelleira de Deportes, José Luis Martínez Sanjurjo e Ana Soneira, foron os encargados de entregar os premios e galardóns, momento no que estiveron acompañados de moitos e moitas representantes e membros dos equipos dos gobernos dos concellos participantes. Cada un dos equipos recibiu como agasallo un trofeo conmemorativo, ademais de equipacións e material deportivo.