Bisbarra, 30 de agosto do 2022 – As axudas da Xunta de Galicia permitiron acometer melloras no local social da Asociación de Veciños de Morlán, no concello de Trazo.
Os traballos en Morlán foron visitados polo delegado territorial, Gonzalo Trenor, O investimento, de 17.000 euros, permitiu actualizar as instalacións e dotalas dunha maior accesibilidade.
O local social de Morlán conta, a partir de esta reforma, cun novo almacén e unha beirarrúa perimetral a todo o edificio. Tamén se eliminaron as barreiras arquitectónicas mediante a construción dunha rampla de acceso para persoas con mobilidade reducida e instalouse un termo eléctrico e unha estufa de pellets.
O obxectivo foi conseguir un lugar onde os residentes poidan realizar e ter acceso a todo tipo de actividades sociais, culturais e de lecer. O local seguirá servindo para manter reunións das diversas asociacións locais como cumas, asociacións de mulleres e cooperativas que están asentadas no rural e que forman parte da actividade diaria desta zona de Trazo.
Na súa visita, Gonzalo Trenor recordou que a orde de acción comunitaria incrementou este ano o seu orzamento nun 20% con respecto ao 2021, ata acadar os 3 millóns de euros. O reforzo encádrase na aposta da Xunta polo asociacionismo veciñal e a xestión conxunta de bens e servizos por parte da poboación galega.
Segundo informou o representante do Goberno galego, na comarca de Santiago apoiáronse a oito entidades veciñais dos concellos de Santiago, Padrón, Rois, Teo, Trazo e Vedra cunhas axudas que ascenderon a 121.000 euros e que mobilizaron en total case 130.000 euros.
Trenor lembrou que este investimentos poden ir destinados ao acondicionamento, reforma e ampliación dos locais sociais e á compra de equipamentos básicos para o seu funcionamento, como mobiliario, equipos informáticos e audiovisuais ou material non básico específico para levar a cabo determinadas actividades.
Por outra banda tamén son subvencionables proxectos de mellora, reforma e reparación das instalacións das traídas de auga promovidas por comunidades de usuarios de augas para garantir o abastecemento.
