Compostela, 19 de novembro do 2020 – Os traballadores da Escola de Música de Santiago veñen de emitir un comunicado no que denuncian que seguen sen cobrar unha nómina completa desde o mes de setembro.
Os empregados da Escola de Música lembran que se está prestando o servizo con total normalidade e, aínda así, o 1 de decembro levarán 3 nóminas sen ingresar. Os traballadores mostran a súa preocupación xa que a continuidade da Escola de Música depende tan só da súa vontade.
Un problema antigo
Os traballadores explican que levan traballando todo o ano, mesmo durante o confinamento, e desde maio os retrasos nas nóminas foron constantes. A última nómina completa que cobraron foi a de agosto. Din estar nun situación límite “tanto económica como emocionalmente porque nestes momentos sentimos que os únicos que están a asumir a responsabilidade real do servizo municipal somos exclusivamente nós”.
Imaxe de arquivo dunha protesta dos traballadores da escola
Denuncian “a situación de desatención que estamos a vivir, a ausencia de respostas concretas, de solucións inmediatas e de información fluída e veraz que nos permita ver cando será posible cobrar”. A única resposta recibida ata o momento, din, é que non se sabe cando se vai cobrar e reclaman que se restableza inmediatamente a normalidade dos pagos así como que se tomen medidas para que esta situación non se volva repetir.
Avaliación da CIG-Ensino da situación
CIG-Ensino, como representación dos traballadores e traballadoras, apoian as reivindicacións e lembran que se trata dunha cuestión que que lle compete exclusivamente á empresa. Por outra banda o sindicato esíxelle ao concello “que deixe de mirar para o outro lado e que lle efectúe á empresa os pagamentos pendentes para que esta poida contar con liquidación. É inadmisíbel que os sucesivos gobernos de Santiago maltraten deste xeito un servizo tan importante para a cidade coma este”.
