Compostela, 6 de maio do 2024 – O Partido Popular de Santiago reclama medidas ante o aumento da delincuencia en Compostela. Desde o 2017, segundo os datos do ministerio do interior, creceu un 25%.
Nunha rolda de prensa na que reclamou a activación da gravación nas cámaras de seguridade da cidade; o concelleiro popular José Ramón de la Fuente explicou os datos que os levan a está petición.
De la Fuente dixo que “crecen todas as figuras delituosas salvo as estafas informáticas, aumentando os delitos contra a liberdade sexual, en case un 60%, rexistrando o maior número de delitos desde 2016; e os roubos con forza en domicilios e establecementos, que suben máis de un 71%, a maior cifra nos últimos 8 anos”.
O Partido Popular tamén explica que o pasado ano, Santiago sufriu o segundo maior incremento da criminalidade en Galicia, só detrás de Lugo. De la Fuente reclama que “as cámaras de videovixilancia e do proxecto Smartiago que temos instaladas, sobre todo as do Casco Histórico, cumpran a súa función, pero a realidade é que, actualmente, ou non gravan ou as imaxes son inservibles, polo que os efectivos policiais non poden empregalas para o esclarecemento de delitos”.
O popular remarcou que desde o goberno municipal “non dan unha razón convincente de porque non queren que se empreguen as cámaras e, a tenor do que están facendo, a veciñanza debe saber que a inversión en seguridade non é economicamente rendible”.
De la Fuente engade que “Non se pode negar que volveron os altercados ao Toural; proliferan os narcopisos; cada vez son máis frecuentes os asaltos a comercios; os veciños padecen macrofestas ilegais multitudinarias en naves abandonadas; e, recentemente, podemos presenciar persecucións automobilísticas, datos que corroboran os publicados polo Ministerio de Interior”.
