En Tabernalia queremos contar as historias da hostalería de Compostela e da bisbarra. Non falamos de gastronomía, falamos das persoas que a fan posible.
Fuxir por un momento de Compostela e plantarse nunha ruela de Tokio é algo moito máis doado desde hai uns meses.
Nara é un local de comida asiática aberto por Humbert e Tamara e, a dicir de quen estivo nos dous sitios (Tokio e Compostela), un pode illarse ata o punto de esquecer onde está. O feito de atoparse nun espazo como a Ruela de Entrerruas axuda moito.
Un catalán e unha galega da Pobra que se coñeceron traballando en Barcelona e que combinan no seu local a paixón pola restauración e por todo o asiático. Nas paredes podemos ver imaxes do mítico Estudio Ghibli que ven de gañar o Óscar á mellor película de animación e unha Palma de Ouro honorífica en Cannes. Con ese fondo, Humbert e Tamara cóntannos o seu particular anime vital
As veces hai que facer da necesidade virtude. Isto foi o que lle pasou a Humbert xa que a súa aprendizaxe na comida asiática naceu cando foi despedido dun local. En calquera caso Nara é algo distinto, como puntualiza Tamara; podería ser un restaurante asiático levado de xeito familiar pero en realidade é un restaurante familiar que ofrece comida asiática. Pode parecer o mesmo, pero non o é.
Para Tamara Compostela, o anime ou a comida asiática forman parte da súa vida así que séntese como na súa casa. Un fogar que encaixou como un guante no negocio que Humbert e ela decidiron montar. A pandemia deixou moitas cicatrices pero abriu camiños cos que ninguén contaba e o deles acabou en Compostela e en Nara.
O pequeno local triunfa case desde o primeiro día. Non fan reservas pero usan lista de espera virtual. Os primeiros días de uso de esta ferramenta tiveron os seus atrancos xa que, como sempre pasa, non todo o mundo é tolerante. Tamara ve as redes sociais e os comentarios con mías distancia, a Humbert cóstalle algo máis.
Non podemos rematar a conversa sen pedir unha recomendación. Humbert o ten claro, aínda que sexa do que máis traballo lle da aposta polos baos.
Nara é un local na liña dos que acostumamos a mostrar en Lindeiros. Especializado, personalizado arredor dunha idea, pero sobre todo feito desde o corazón. Tamara e Humbert poñen toda a paixón no que fan e iso acaba por chegar ao cliente. Más alá de ofertas tópicas, Nara trae a Compostela un anaco de Asia aínda que sexa nas mans dun catalán e unha galega. Non deixedes de probar, agardar para entrar paga a pena.
