Teo, 18 de xuño do 2021 – O Plan de Restauración da canteira da Casalonga prevé crear unha división de 11.000 m² de eucaliptos.
A medida tería como obxectivo “minimizar na medida do posible o impacto visual das frontes”. Sería unha “pantalla visual arbórea nas partes noroeste, oeste e sur da explotación”. O ancho previsto para esta división vexetal da canteira sería de 10 metros e os pes que se queren plantar terían unha altura mínima de metro e medio.
Continuidade da explotación
A Xunta remitiu ao concello de Teo o Plan de Restauración da canteira da Casalonga. O envío do documento responda a unha petición de información realizada a primeiros de xuño xa que a Dirección Xeral de Minas non considera que teña que ter exposición pública.
O concello cuestiona que a tramitación actual se axuste a dereito xa que se deféndese que é preciso a tramitación dunha Declaración de Impacto Ambiental e neste momento a Xunta opta por outra vía de tramitación.
O Plan recoñécese como unha actualización do presentado no ano 2001. Indica tamén a intención de continuar coa explotación da canteira polo que “a rehabilitación do espazo realizarase unha vez conclúan os traballos de explotación”.
O proxecto non explícita unha protección específica para a actual lagoa e indica que “a recuperación das formacións vexetais existentes na zona e favorece a colonización por parte da vexetación e fauna autóctona. En definitiva, permite a recuperación do ecosistema preexistente que fora alterado”. O documento prevé ademais devolver o terreo a “un uso de aproveitamento forestal”.
Desde o concello de Teo indícase que no expediente consta unha proposta de resolución de aprobación definitiva. Na actualidade os técnicos municipais están analizando o Plan para ver o seu alcance.
O Plan de restauración presentado en maio do 2020 pode consultarse no seguinte enlace.
