Teo, 15 de setembro do 2018 – A empresa Toysal, promotora da planta de residuos de Calo en Teo, ven de presentar ante a Xunta un plan de restauración da canteira que inclúe teconosolos similares aos que pretendía reciclar.
O concello de Teo recibiu este venres unha solicitude de informe sobre o mencionado plan de restauración presentado por Toysal, propietaria da antiga canteira. Na documentación a empresa indica os residuos cos que pretende encher o oco actual e que incluirían inertes obtidos dos seguintes procesos: residuos de prospección, extracción de minas e tratamentos físicos e de minerais; residuos de procesos térmicos; da construción e demolición e residuos municipais. O volume de materiais chegaría aos nove millóns de metros cúbicos.
O Concello de Teo dispón agora de 10 días hábiles para “a emisión do correspondente informe sobre materias da súa competencia”. Neste caso a única competencia sería urbanística. Dende o departamento de Urbanismo solicitaron hai días unha entrevista co Director Xeral de Minas, Ángel Bernardo Tahoces, na que se pedía precisamente información sobre o plan de restauración.