Teo, 20 de outubro do 2020 – A empresa Toysal, propietaria da canteira da Casalonga en Teo, intentou pechar cunha cancela a estrada que bordea o lugar.
A estrada en cuestión é froito dun antigo debate sobre a quen pertence. O concello considera que, según a documentación da que dispón, é de propiedade municipal mentres que a empresa Toysal defende que é súa aínda que non aporta probas.
Este luns veciños que pasaban pola estrada sorprendéronse ao ver como varios vehículos colocaban maquinaria na calzada coa intención de instalar unha cancela que pechara o paso. Alertada a Policía Local e a Garda Civil no lugar presentáronse tamén o alcalde Rafa Sixto,e a primeira tenente de alcalde e concelleira de urbanismo, Uxía Lemus, acompañados do arquitecto municipal.
Mentres a Garda Civil impedía aos veciños que se foron congregando achegarse ao lugar, os responsables municipais discutían cos representantes de Toysal. Tras varias horas a empresa finalmente retirou as máquinas e a estrada permaneceu aberta. O alcalde, rafa Sisto, explicaba onte que, incluso no caso de que a estrada fora da empresa, tería que ter pedido permiso para a obra cosa que tampouco se chegou a facer.
O usuario de Facebook Marki NH oS subía á rede este vídeo no momento en que se producían os feitos
Movementos previos
Desde a Plataforma Casalonga Limpa de Residuos explican que esta acción de Toysal foi precedida de varios movementos nas últimas semanas que, para eles, non son coincidencias.
Según contan desapareceu o sinal de limitación de tonelaxe da mesma vía pero o concello o repón tras coñecer a súa desaparición. Aparece varias veces aberta a válvula de peche da auga da lagoa da canteira e a plataforma puxo este acontecemento en coñecemento de Augas de Galicia e da policía autonómica.
Na última semana a Dirección Xeral de Minas comunica ao Concello e ao presidente da Plataforma que en agosto arquivaron o expediente de caducidade da canteira. Un expediente que foi iniciado por eles mesmos. A Xunta alega que as razóns que lles levaron a iniciar a caducidade (a inactividade na canteira) non se poden demostrar. Ademais, nese comunicado, expoñen tamén que non consideran parte interesada no expediente nin ao Concello nin ao presidente da Plataforma. O alcalde, Rafa Sisto, é da mesma opinión “a responsabilidade directa da Dirección Xeral de Minas que, coas súas decisións arbitrarias envalentona aos propietarios da concesión mineira”.
Para a Plataforma Casalonga Limpa de Residuos “a coincidencia no tempo de todos estes feitos son, cando menos, sospeitosos e pon en alarma á veciñanza”.
A plataforma, nunha reunión de urxencia onte á noite prepárase para presentar accións legais. Este mércores reuniranse o presidente e vicepresidente da plataforma, o alcalde e a conselleira de urbanismo coa Directora Xeral de Medio Ambiente nunha xuntanza convocada antes dos últimos acontecementos.
