Touro, 24 de xullo do 2019 – A Marea Veciñal de Touro denuncia o uso do alumeado público para unha finca particular dun empresario afín ao Partido Popular.
A Marea lembra que no mes de maio o alcalde de Touro Ignacio Codesido recoñecía que utilizou á empresa concesionaria do alumeado público para colocar os carteis electorais do Partido Popular. O propietario da empresa Electricidade Lorenzo recoñecía ser do Partido Popular e contradicía a versión do alcalde ó afirmar que non cobraba nada por esta labor, cando o rexedor local afirmara que lle pagaría cincuenta ou cen euros sen especificar como os xustificaría.
A este capítulo de suposta corrupción política súmase, sempre según a Marea Veciñal de Touro, a colocación dunha farola do alumeado público orientada cara a vivenda familiar do propietario da concesionaria. Denuncian que isto supón que o concello pague con cartos de todos a iluminación privada dun empresario afín ó partido.
A marea veciñal rexeita estas prácticas do goberno e ínstao a retirar a farola, reservándose o dereito de tomar as medidas legais que consideren oportunas.
