Tordoia, 20 de xaneiro do 2020 – A Deputación da Coruña e o Concello de Tordoia veñen de asinar un convenio de colaboran para a promoción e divulgación do dolmen de Cabaleiros.
O convenio, que supón unha achega económica de 3.815 euros, ten como obxectivo incluír ao dolmen de Cabaleiros na estratexia de turismo municipal e provincial, favorecer o seu uso educativo e didáctico e implicar á poboación local na súa posta en valor.
O presidente do organismo provincial, Valentín González Formoso, e o alcalde de Tordoia, Eduardo Antonio Pereiro Liñares, xunto co deputado responsable da área de Contratación, Xosé Lois Penas, foron os encargados de asinar o documento.
Visitas guiadas e redes sociais
O acordo contempla accións de divulgación e comunicación a través de redes sociais, medios de comunicación ou material impreso. Fomentaranse as visitas ao dolmen de grupos de escolares de toda a provincia e durante os meses de verán prestarase un servizo de guía que explique aos grupos organizados que o visiten a historia e o valor etnográfico do monumento.