займ срочно

Presentase o último tramo da Vía Verde que unirá Compostela con Cerceda

0

Compostela, 15 de febreiro do 2023 – Onte presentáronse as dúas fases finais da Vía Verde que unirá Santiago de Compostela con Cerceda, alcanzado cerca dos 30 quilómetros de percorrido.

A Deputación dará o visto bo, no plenario de este mes, a un investimento que servirán para licitar o primeiro dos dous tramos dos que consta a Vía Verde no termo municipal compostelán. O orzamento para ese primeiro tramo divídese en 500.000 euros achegados polo ente provincial, e 300.000, polo Concello.

En Santiago reuníronse para presentar o proxecto o Delegado do Goberno, José Miñones; o Presidente da Deputación, Valentín González; O Vicepresidente do ente provincial, Xosé Regueira; os alcaldes Xosé Sánchez Bugallo, Santiago; Juan Manuel Rodríguez, Cerceda; Antonio Pereira, Tordoia; e Luís Rey, Oroso; a concelleira de Medio Ambiente de Santiago, Mila Castro; ademais do presidente da Asociación de Concellos da Vía Verde, Antonio Leira.

No acto salientouse que en breve sairá a licitación a obra do primeiro tramo da Vía Verde ao seu paso polo concello de Santiago. A Deputación da Coruña levará a cabo as actuacións de contratación, execución e dirección das devanditas obras.

A segunda fase do tramo compostelán suporá outros 800.000 euros de investimento, dos que 300.000 euros serán aportados polo Plan de Sostibilidade Turística en Destino, presentado no acto; 250.000 euros investidos pola Deputación da Coruña e 250.000 euros máis do Concello de Santiago. Actualmente a Fundación Ferrocarriles Españoles está adaptando o proxecto, seguindo a mesma liña que nos restantes tramos.

Proxecto de acondicionamento da Vía Verde

O proxecto da Vía Verde ten por obxecto o acondicionamento deste trazado ferroviario da liña Santiago – A Coruña entre as inmediacións da antiga estación da Sionlla de Abaixo e o límite do termo municipal co concello de Oroso, nas inmediacións do núcleo de Sigüeiro e nas proximidades de Bálsoma.

Actuarase na primeira fase sobre 2,165 quilómetros, que non producirán afección algunha sobre bens de interese cultural ou xacementos arqueolóxicos, xa que non afecta directamente a ningún elemento catalogado, ao discorrer o proxecto sobre a plataforma xa existente do antigo ferrocarril.

O primeiro tramo a rehabilitar contempla un trazado no que se atopan dous túneles. Un a medio quilómetro da estación da Sionlla, que discorre baixo a N-550 e conta con 454 metros de lonxitude, que se atopa nun bo estado xeral, segundo o informe do proxecto, aínda que presenta filtracións, máis importantes nos longos períodos de choiva.

O segundo túnel, de 385 metros de lonxitude, transcorre baixo o Monte Cacheiro e o Camiño de Santiago Inglés, na variante de Agualada. Atópase máis deteriorado que o anterior, cun nivel elevado de filtracións de auga.

Entre as actuacións que se van realizar figura a roza e retirada de vexetación, cascallos e lixos, no seu caso; o reperfilado e nivelación da capa de balastro existente; o estendido e compactación dunha capa de zahorra de espesor medio de 15 cm.; e o perfilado e execución de cunetas.

As solucións sinaladas aseguran unha gran accesibilidade, xa que permiten o percorrido de todo tipo de bicicletas, de cadeiras de rodas, de carriños de bebés e de persoas con minusvalías. A maiores, confire un gran atractivo á Vía Verde, pois permite que os usuarios a perciban como un “novo produto”, perfectamente definido e diferente doutros existentes, e que facilita o percorrido e acceso aos puntos de interese.

Tamén está prevista a instalación de elementos de protección, como varandas, elementos de sinalización e elementos auxiliares, como indicación de puntos quilómetricos, pivotes extraíbles, aparcabicicletas e bancos e mesas nas áreas de descanso; e a iluminación dos túneles con lámparas leds, alimentadas por paneis solares.

Share.

Comments are closed.