Bisbarra, 8 de febreiro do 2023 – Nas últimas semanas seguen a producirse retrasos e cancelacións no transporte escolar de Teo e o grupo socialista reclama que se convoque o Consello Escolar Municipal.
O último caso sucedeu este mesmo luns no CEIP de Calo e os país tiveron, unha vez máis, que substituír ao transporte escolar. Desde o Psoe lembran que este tipo de situacións provocan graves problemas de conciliación e retrasos dos país na entrada do traballo.
Son situacións que se veñen dando de cando en vez desde o inicio do curso. No mes de setembro a deputada socialista Noa Díaz levaba á Comisión de Educación do Parlamento esta problemática e en aquela ocasión a popular Teresa Egerique Mosquera falaba de “casos puntuais” aínda que recoñecía que desde os cambios no servizo, no curso anterior, xa se tiveran que abrir expedientes de incumprimento.
Convocatoria do Consello Local de Educación
O Psoe de Teo levará ao seguinte pleno unha moción para que se convoque de xeiro “inmediato e urxente” o Consello Escolar Municipal ara que “ditamine sobre o conflitos do transporte escolar, co fin de presentar dito ditame ante as autoridades competentes”.
No segundo punto da moción o Psoe reclama da Consellería de Educación e do Presidente da Xunta “a solución urxente a este conflito, e que se tomen as medidas oportunas co fin de que á empresa Monbus cumpra co establecido no contrato”.
A ex concelleira de educación do Psoe, Mayte Argibay, engade que os problemas “producense, polo que parece, por que non hai autobuses suficientes para facer tódalas rutas obxecto do contrato, e por este motivo, uns días o autobús acude a unhas paradas nun concello e outros días deixa estas paradas sen servizo para acudir ás que deixara os días anteriores”.
O Psoe de Teo lembra que esta falta de autobuses incumpre claramente o contrato en vigor no que se establece un incremento do número mínimo e imprescindible esixido de vehículos, cun 10% adicional dos vehículos de reserva necesarios para cubrir calquera tipo de incidencia ou imprevisto.
