Bisbarra, 9 de febreiro do 2023 – Despois de que o pasado día cinco a parroquia de Rarís abrira o Entroido coas comparsas, xenerais e correos o concello preparase xa para esta fin de semana.
As comisións das distintas parroquias traballaron para conseguir que este ano, por fin, volvera o Entroido máis tradicional a Teo. A seguinte cita será en Reis tanto o sábado 11 como o domingo 12. Ademais o domingo, ao redor das 18:00 horas, haberá un pasarrúas en Pontevea cun entroido convidado, o Entroido dos Cobres de Vilaboa do Morrazo. E haberá atranque nas dúas xornadas, sobre as 19:30 horas no campo da festa da parroquia.
A vindeira semana será xa a quenda de Santa María de Teo, o día 18. Logo de andar pola parroquia os xenerais farán o atranque na campo da festa a partir das 20:00 horas.
Festa de interese turístico
O entroido dos Xenerais da Ulla foi declarada festa de Interese Turístico de Galicia no ano 2013, e os Concellos de A Estrada, Boqueixón, Santiago, Silleda, Teo, Touro, Vedra e Vila de Cruces colaboran conxuntamente na revitalización e promoción deste evento. Mais o mérito principal do mantemento desta tradición é das asociacións e comisións das parroquias, que son os principais impulsores e dinamizadores desta celebración.
O Entroido dos Xenerais da Ulla remonta as súas orixes á primeira metade do século XIX e baséase nos enfrontamentos bélicos que se viviron na comarca nese período: a invasión do exército napoleónico, a revolución do 1846 ou as guerras carlistas.
Os oito concellos nos que se celebra o Entroido traballan conxuntamente na revitalización e promoción desta festividade dende o 2011.
Tedes todas as datas de todos os concellos en https://xeneraisdaulla.gal/
