Teo, 1 de xuño do 2018 – Rafa Sisto, alcalde de Teo, e Uxía Lemus, responsable de urbanismo, reuníronse co responsable de servizos básicos de Ames, Blas García, o concelleiro de medio ambiente, Javier García, e o alcalde de Brión, José Luís García, para falar da planta de reciclaxe de residuos que pediu licenza de instalación na Casalonga.
A preocupación na Casalonga é constante desde que a empresa Toysal solicitou a Xunta de Galicia a autorización ambiental integrada. Aínda que se trata dun proceso longo no que o proxecto será sometido a exposición pública e no que se requirirán diversos informes sectoriais, incluído o do concello, os veciños xa se organizaron nunha plataforma e mostraron a súa oposición.
Rafa Sisto agradeceu a receptividade amosada polos responsables de Ames e Brión e pediulles colaboración no período de alegacións. Ames e Brión limitan con Teo en zonas afectadas pola instalación da planta polo que sos responsables municipais mostraron tamén a súa preocupación por que Toysal reciba a autorización e polo negativo impacto que tería no territorio.
Moción aprobada por unanimidade
En relacióin con este tema o pleno da corporación de Teo aprobaba por unanimidade unha moción sobre este proxecto. A proposta é froito da colaboración establecida entre os grupos políticos municipais. Na mesma acordouse, entre outros puntos, rexeitar que a instalación de xestión e tratamento de residuos sexa unha actividade permitida en solo rústico, conforme ao establecido no artigo 35 da Lei 2/2016, do solo de Galicia así como adoptar todas as medidas necesarias, de forma conxunta e coordinada, desde un punto de vista tanto institucional como administrativo e respectando a legalidade vixente, para evitar a instalación desta planta de reciclaxe na Casalonga.
Tamén se amosou o apoio ás veciñas e veciños afectados e apoiar as súas reivindicacións destinadas a defender os seus dereitos e a súa calidade de vida e poñer á súa disposición os medios e os recursos para informalos e asesoralas.
Como é o proxecto da planta?
A planta ocuparía unha extensión duns 135.000 metros cadrados na antiga canteira da Casalonga. Está pensada para tratar diversos tipos de residuos orgánicos, cun volume que segundo o proxecto da empresa se situaría entre as 80.000 e as 90.000 toneladas anuais. Os máis numerosos serían os lodos procedentes de depuradoras de augas residuais (25.000 toneladas ao ano), residuos de industrias agroalimentarias (22.000 toneladas anuais) e lodos de conserveiras (20.000 toneladas anuais). Ademais procesaría 10.000 toneladas ao ano de subprodutos animais non destinados ao consumo humano, tecnicamente coñecidos polas siglas SANDACH, e unhas 3.000 toneladas anuais de xurros e estercos.
O proxecto contempla habilitar os camiños de acceso e construír unha nave de recepción dos residuos agroalimentarios con dous tanques para líquidos e semilíquidos e un búnker para sólidos, así como instalar dous dixestores anaeróbicos, un tanque de almacenamento dos dixestatos e a construción das oficinas.
O proceso ao que se someten os residuos serve para obter fertilizantes, metano para producir electricidade de autoconsumo da planta, augas de condensación e residuos inertes como plástico, metal e envases. As augas serían empregadas, segundo a compañía promotora do proxecto, para tarefas internas como o lavado de camións e para un hipotético rego de plantacións forestais. O proxecto practicamente non detalla o destino dos fertilizantes nin os estudos de demanda dos produtos obtidos.