Compostela, 7 de agosto do 2018 – A xornada do Feito a Man parece querer resarcirnos das suspensións de onte e presenta ata 4 artistas distintos que van do soul ao pop pasando pola música tradicional.
É precisamente o soul, xamaicano según din, o primeiro que poderemos escoitar. Hoxe a sesión vermú corre a cargo de The Show Bass (The Xoubas). Será a unha e media da tarde na Rúa Nova. Trátase dunha banda de rocksteady, R&B e soul xamaicano formada en Santiago de Compostela a finais do ano 2015. O denominador común dos seus integrantes é o respecto e gusto polas músicas de raíz contando entre o seu repertorio con clásicos da música xamaicana e adaptacións de temas cubanos, mexicanos e arxentinos ao estilo. The Show Bass (The Xoubas) está formada por catro integrantes: Fran- Batería e Percusión, Diego- Baixo eléctrico, Pablo- Guitarra eléctrica e Nerea- Voz
Continuamos as oito da tarde na Vía Sacra con Talabarte. Unidos pola madeira dos seus instrumentos e cunha concepción musical común, funden conceptos diversos na súa viaxe musical: acústico, de raíz, improvisación, atemporalidade, aventura, surrealismo, gastronomía… Os seus nomes están intimamente vencellados con grandes proxectos da música galega coma Berrogüetto, Marful, ou prestixiosos músicos de jazz coma Jorge Pardo, Walter White ou Steve Brown. Tras publicar o seu primeiro traballo discográfico, colectaron grandes eloxios de crítica e público levando a súa musica por teatros, auditorios e festivais da Península Ibérica, Bretaña, Portugal, Serbia… Ademais de deseñar concertos singulares como “Ao son da Cociña” que une música, gastronomía e arquitectura. Os seus concertos teñen risco, improvisación e contundencia. Un grupo que non deixa a ninguén indiferente e mantén en movemento a alma e os pés.
Pop para rematar o día
A xornada ten dobre sesión para rematar, será a partir das dez en Tras Salomé. Desde Portugal chega María Reis. Música profesional como compositora, guitarrista, cantante e cofundadora da banda Pega Monstro dende os quince anos. Tamén leva o selo portugués Cafetra Records co seu grupo de amigos. Debutou recentemente en solitario co EP Maria, lanzado en agosto de 2017. A comezos deste ano encargouse de abrir os concertos da xira europea de Panda Bear.
A continuación é a quenda de Esposa. Esposa fan pop. Ás veces tócano moi rápido e pódese bailar e berrar, e ás veces non. Ao tempo que sorrín e moven os pés están cantando preguntas e falando da súa vida. Tampouco é que sexa contraditorio. O seu LP debut chámase Xardín interior e publicouno Prenom o ano pasado.