Silleda, 22 de Nadal do 2017 – O alumnado do Ciclo Superior de Xestión de Vendas e Espazos Comerciais do IES Pintor Colmeiro de Silleda colaborou, un ano mais, coa campaña Un agasallo, un sorriso, posto en marcha dende a Concellería de Benestar Social a través do programa Silleda Solidaria e a educadora social.
A concelleira Pilar Peón recolleu no IES os agasallos que foron depositados neste centro educativo ao longo dos últimos días no marco da citada campaña. Todos eles foron empaquetados polos alumnos e alumnas do ciclo.
Pilar Peón agradeceu o traballo realizado polos rapaces e tamén “o xesto solidario de todas as persoas que colaboraron aportando xoguetes e outros agasallos para as familias con menos recursos neste Nadal”, engade.
Estes agasallos sumaranse aos recollidos no departamento de Benestar e ás doazóns que se recollen en distintos eventos do programa de Nadal, caso do torneo solidario de fútbol biberón que terá lugar este sábado no pavillón.
