Bisbarra, 17 de abril do 2024 – O Servizo de axuda no fogar, o SAF, converteuse en todos os concellos nun dos servizos máis importantes e Silleda o mellorará implementando una APP de coordinación.
Foi un dos compromisos adquiridos nas reunión que concello, auxiliares socio sanitarias e usuarios do SAF mantiveron nos últimos meses. A mellora da coordinación do servizo realizarase a través da contratación da aplicación CIBERSAD Profesional, ampliando así as ferramentas do sistema de xestión do servizo e facilitando o traballo entre ambas partes.
A alcaldesa de Silleda, Paula Fernández, agarda que “con este programa se mellore de xeito substancial a coordinación do servizo, o que redundará ademais nunha mellor atención ás persoas usuarias”.
A formación sobre esta nova plataforma informática que utilizará o SAF de Silleda será impartida polo persoal de coordinación a todas as auxiliares socio sanitarias. Unha das melloras que xa se están a levar a cabo é a continuidade da formación para profesionais socio sanitarias. Onte martes celebrouse a primeira das sesións formativas para a mobilización de persoas dependentes.
Trátase dun curso exclusivo para as auxiliares socio sanitarias do SAF do Concello de Silleda que continuará o vindeiro martes día 23 tamén en horario de tarde.
Así mesmo, nas vindeiras xornadas realizarase outra das formacións, neste caso centrada en habilidades sociais, e que se vai impartir con persoal técnico do propio departamento municipal de Benestar Social.
Atención psicolóxica e bolsa de emprego
Por outra banda, e tamén a raíz das cuestións que xurdiron nas reunións ca plantilla, xa está tamén activo o servizo de atención psicolóxica para as auxiliares do SAF, que poderán solicitalo no propio departamento de Benestar.
“Sabemos que é un traballo duro e consideramos que ademais do esforzo físico hai unha parte emocional que é moi importante atender, en definitiva, coidar das persoas que coidan”, indica a alcaldesa, Paula Fernández.
Dende o goberno municipal tamén se están a ultimar as bases para abrir un novo proceso de contratación de auxiliares ca correspondente bolsa de emprego. “Agardamos que o proceso se active nos vindeiros días de cara a ampliar a plantilla, o que nos permitirá reducir a lista de agarda deste servizo”, conclúe a alcaldesa.
