Silleda, 5 de abril do 2021 – O Concello de Silleda continuará este ano mellorando distintas vías de comunicación no municipio cun investimento de 600.000 euros.
A partida económica prevista por Silleda forma parte dos fondos que lle corresponden do Plan Concellos da Deputación no presente exercicio de 2021. Con estes orzamentos executarase a mellora dunha ducia de tramos en distintos puntos do termo municipal. O alcalde Manuel Cuíña indica que esta cantidade “que suporá a mellora integral dunha serie de viais con gran tránsito e vertebradoras de distintas localidades e servizos”.
Zona de Parada
No proxecto figuran un tramo do vial de entronque ca glorieta da PO-211, dende o recinto feiral Semana Verde. Tamén mellorarase o acceso á explanada do CEIP Ramón de Valenzuela da Bandeira; neste caso trátase dun tramo que se atopa en mal estado e que conecta cunha das circunvalacións arranxadas nos últimos anos.
Xa na zona rural o plan de mellora viaria inclue actuacións en distintas parroquiascomo a da Ponte (no vial que une Espiño e Carderrei e tamén no vial de entronque ca PO-205 que da acceso a varios lugares). Na parroquia de Vilar arranxarase o vial entre O Barral e Mazarelos e en Carboeiro outros dous tramos: un en Carboeiriño e o que une este último lugar ca parroquia de Ansemil, con case 1 kilómetro de lonxitude.
En Lamela actuarase nun tramo de 1.095 metros dende o acceso da N-525 na Goleta atra o lugar de Vilariño.
Tamén con cargo a este plan de actuación se mellorará a pista central da parroquia de Dornelas, con algo máis de 2, 4 kilómetros de lonxitude. Nesta zona figura tamén o vial do Curro, na parroquia de Cira, dende o entronque ca EP7017.
Inclúese tamén a reforma integral do vial dende Riocalvo ata Rellas, pasando por Gamil, en Margaride; así coma o tramo de estrada que vai dende a N-640 en Moalde en dirección a Olives, tamén con máis de 1,3 kilómetros de lonxitude.
Completan o proxecto dous viais na parroquia de Taboada:o tramo desde Trasdovalo ata Ponte Taboada e o que vai dende a estrada N-525 ata o lugar de Carballeda.
En todas elas acometerase a mellora do firme cunha nova capa de rodadura con aglomerado en quente.
“Este novo proxecto unido ao de 2020 con outros 7 viais que se executará nos vindeiros meses e a outras actuacións suporá unha mellora sustancial na extensa rede viaria que temos no municipio de Silleda, e que continuamos a mellorar con apostas de calado coma esta, con máis de 600.000 euros de inversión”, engade o alcalde, Manuel Cuiña.
