Bisbarra, 19 de novembro do 2018 – Os dous equipos da bisbarra na segunda división nacional de Fútbol Sala, O Santiago e o Noia, volven da fin de semana con sendas derrotas e seguen en postos de descenso directo.
O Santiago Futsal marca pero non chega
Recuperar o olfacto goleador non lle serviu ao Santiago Futsal na súa visita ás Illas Canarias. Un total de 6 tantos quedaron en inferioridade ante os sete goles que o conxunto de Suso Méndez materializou para que os tres puntos quedasen en Gran Canaria. Derrota dolorosa, despois de levar o partido de fronte durante 30 minutos pero que se escapou na súa fase final. O fallo no dobre penalti nos últimos segundos do partido acabou por trastocar de todo ao equipo celeste.
O partido entrou nunha dinámica de máxima igualdade desde o asubío inicial. Dani Zurdo inaugurou a longa lista de goles da tarde, á que se sumou Víctor Cachón para o 1-1. Brian foi o autor do 1-2 e do posterior 7-5, aínda que a madeira frustó en dúas ocasións que o canario puidesen aumentar a súa conta e a do seu equipo, que ben puido cambiar o devir do encontro. E a eles seguiron Juanillo e Michael antes do descanso para o 3-2 que reflectía o marcador no tempo de recreo.
O santiagués Dani Branco puxo de novo a igualada e Álex Motos anotou o 3-4 para referendar os mellores minutos do equipo celeste. Con todo, nun saque de falta directo Mehdi fixo o 4-4 e, apartir de aí, rompeu o partido. Saúl, Juanillo e, por último Álex Velasco, rubricaron a lista amarela; o último tanto xa aproveitando a recuperación dun balón en ataque de porteiro-xogador do Santiago Futsal no 37′. Brian e Lucas apuraron as opcións celestes ata o 39′. E por último, un dobre penalti a favor dos galegos que detivo Abraham pechou o gran encontro entre dous equipos que seguen tomándolle o pulso á categoría de prata.
O Noia perde pola mínina en Castellón
O Noia perdeu a ocasión de saír de postos de descenso tras perder por 5-4 contra o seu rival directo, o Bisontes Castellón. Empezaba o partido coa sorte ao lado do bloque galego que marcaba o primeiro tanto do encontro aos 2 minutos cun tanto de Marci, o capitán noiés que entraba no cinco inicial de Marlon Velasco xunto a Carlos Cabo, en portería, Dani Colorado, Xuxa e David Palmas. Tamén terían a súa oportunidade Antoñito, Sergio Quilez, Christian Chao, Juan Puertas e Jorge Belo. Tras o pirmer tanto galego, estes faríanse dominadores do partido. Un dominio que duraría ata o primeiro tanto local, no minuto 9, dun tiro ao segundo pau de Chema. Co marcador en táboas e sen tempo para asimilalo chegarían o segundo dos castellonencos tras o saque de centro. Nesta ocasión sería David, que marcaría os 2 restantes, quen aproveitaría un roubo na frontal para adiantar aos seus no luminoso.
A pesar da boa defensa noiesa e a presión en primeira linea; a volta no marcador faríalle dano ao bloque galego que precipitaría o seu xogo en busca dun tanto que non chegaba. As imprecisións nos pases e as perdas de balón capultarían as ocasións noiesas neste primeiro acto.
Os castellonencos estaban a se facer co dominio dun partido aproveitando os erros dos galegos e así o faría de novo David marcando o 3º para os seus no minuto 10 tras un novo roubo de balón. Demasiado castigo para os de Velasco aos que o partido se lles poñía costa arriba… No minuto 12’ Christian Chao tería unha boa ocasión para acurtar distancias cun tiro de falta ao bordo da área pero o esférico pega na defensa local e sae desviado. No 14, tras poñerse os loscales con 6 faltas, Sergio Quilez sería quen desaproveitaría a oportunidade no tiro de 10 metros que pararía Salah que sairía a pista para resolver esta acción.
O último tanto chegaría nos últimos segundos deste primeiro tempo poñendo un 4-1 no marcador, David, antes de marcharse a vestiarios.
Tras o paso por vestiarios renovábase o partido na Ciutat de Castelló cun avultado resultado provisional de 4-1 encontra da escuadra branca. Pero os noieses rexurdirían das súas cinzas e en xa no transcurso dos primeiros minutos deste segundo tempo deixarían claras as súas intencións de ir a por un partido que de gañar, supoñería saír dos postos de descenso. Aos 3 minutos do comezo Xuxa recortaría distancias marcando o segundo gol para o seu equipo. Un minuto despois, a pase de Xuxa, Antoñito poñía o 3º para os seus, avivando un partido que crecía en intensidade. Co 4- 3 no electrónico, Juan Puertas tería nos seus pés o empate pero un acertado Nacho Serra pararía o bo disparo do xogador redondelano. A pesar da arremetida noiesa sobre a portería local, os xogadores do Bisontes FS terían as súas tamén; materializando unha delas no 35 cun gol de Rangel.
De novo a escuadra noiesa tería que remar contracorrente. Nun partido rápido e vivo, as ocasións sucedíanse para ambos os bloques. E nesta ocasión sería David Palmas, que volvería asinar un gran partido, o autor do 4 gol para o seu equipo a falta de cinco minutos para a finalización do partido.
O tempo transcorría en contra dos intereses noieses, e un Christian Chao preparado coa elástica noiesa en banda, tivo que esperar ata o 38 para xogar de cinco. Minutos estes en os que os noieses puideron empatar o encontro xa na primeira xogada cun tiro de Xuxa, tras unha boa triangulación do equipo galego, pero Nacho evitaría que subise ao luminoso. A última teríaa Christian Chao pero finalmente o electrónico non mudou de díxitos e o Noia Portus Apostoli non logra sumar en Castellón.
