Bisbarra, 22 de marzo do 2024 – O Concello de Santa Comba celebra este domingo a IV Carreira Clásica Gandeira con récord de inscricións.
Santa Comba describe esta proba como a “A carreira máis enxebre e autóctona de toda Galicia”. Unha competición que terá lugar este domingo dia 24 percorrendo cinco explotacións gandeiras o que a fai única.
A proba ten dous circuítos. O primeiro de dez quilómetros atravesa 4 explotacións gandeiras. O outro, de tres quilómetros, pasa tamén por unha de estas granxas. A concelleira de Deportes de Santa Comba, Patricia Val, explica que “É unha carreira popular distinta e distintiva, que aos corredores gústalles precisamente por ofrecer uns retos e uns impulsos que non é habitual atopar. E este ano tratamos de potenciar ese carácter autóctono e diferencial para ofrecerlle aos participantes a mellor experiencia posible”.
Este ano o número de inscritos subiu de xeito espectacular, dos 420 do ano pasado ata os 764 desta edición, boa mostra do éxito da proposta. “Atoparnos ao peche de inscricións con ese número foi unha alegría inmensa, porque permite ter un reforzo do traballo que viñemos facendo. O feito de adherirse ao circuíto da Deputación é seguramente un factor que axuda a aumentar o nivel competitivo e, consecuentemente, favorecer o incremento das participacións”.
Patricia Val engade que “Temos a sorte de contar con un club, o CorreXallas, que fai un labor fantástico de promoción, así como tamén con un alcalde que é o mellor embaixador dos eventos do concello e que consigue ofertar ese plus de comunicación que intriga e motiva. Sen esquecer o esforzo para coidar os detalles e o percorrido, que en si xa é un reclamo”.
O incremento no número de inscritos produciuse en todas as categorías, dende a de Pitufos, ata a 10K, a participación subiu máis dun 40 por cen. Dende a organización agardan que o domingo máis de un millar de persoas desfruten con un evento deportivo que contará con atletas de renome no circuíto como Amador Pena, Martin Regueira, Tina Fernández, Fran Pais, Amira Simón ou Esteban Díaz.
“É un luxo poder contar con algúns dos mellores corredores da zona, tanto polo que aportan a nivel competitivo como tamén pola motivación e a ilusión que crean para os demais participantes que poden correr ao seu lado. De feito, unha das cousas que queremos potenciar na Clásica Gandeira é o seu carácter integrador: que poidan desfrutar os corredores e as corredoras de todo os niveis, tanto os pros como aqueles que se marcan o reto de achegarse ao mundo das carreiras pedestres”, di Patricia Val, que tamén agarda “que o domingo de ramos bote raíces para que Santa Comba poida converterse nunha cita destacada e obrigada dentro do circuíto das carreiras en Galicia”.
As carreiras comezarán ás 10:30 co 1K das categorías sub 10 e sub 12. A continuación, ás 10:45, sairá a 3K e ás 11:25 será a categoría Pitufos a que se lanzará apolos 300 metros do seu percorrido, para finalizar ás 11:40 coa saída da concorrida 10K. Ao finalizar a proba raíña procederase á entrega de premios na que se repartirán máis de 100 trofeos entre todas as categorías en un montante de máis de 700 Euros en premios económicos.
