Ribeira, 3 de marzo do 2022 – A Consellería do Mar presentou a remodelación do peirao de Palmeira según o anteproxecto do arquitecto David Chipperfield.
A Conselleira do Mar, Rosa Quintana, participou no acto de presentación do proxecto de mellora da mobilidade e accesibilidade na contorna do porto de Palmeira impulsado desde Portos de Galicia.
Quintana explicou que as actuacións se realizan en coordinación co Concello de Ribeira. O obxectivo principal é renovar a imaxe da dársena e facela máis operativa para os profesionais do mar e atractiva para os veciños e visitantes.
O anteproxecto prevé a actuación no 100% da zona portuaria e divídese en varias fases a desenvolver de xeito progresivo que se irán axeitando á dispoñibilidade orzamentaria e sucesivos convenios co Concello de Ribeira.
A primeira fase, en licitación
Rosa Quintana salientou que o proxecto contempla a urbanización do paseo exterior e da coieira. A primeira das fases está xa en licitación e contan un orzamento de 750.000 euros.
Quintana engadiu que o proxecto está a exposición pública na páxina web do ente público e o prazo de presentación de ofertas está aberto ata o próximo 17 de marzo.
As obras desta fase supoñen a intervención nun espazo de 2.000 metros cadrados e en preto de 400 metros en liña da fachada marítima. As actuacións inclúen a mellora do espazo público e da mobilidade mediante a ampliación da zona peonil a carón do mar, sobre a coieira existente, e eliminando a barreira visual que supón o actual muro de peche.
A maiores, crearanse balcóns de pedra e gradas integradas no noiro do paseo, ordenarase a circulación rodada con pasos de peóns elevados e renovaranse os pavimentos e o mobiliario urbano buscando reforzar a súa calidade estética, duración e homoxeneidade dos materiais.
Unha Palmeira vinculada ao mar
No acto, no que tamén participaron a presidenta de Portos de Galicia, Susana Lenguas, o alcalde de Ribeira, Manuel Ruiz, o arquitecto David Chipperfield e os técnicos da Fundación RIA que participaron no deseño do anteproxecto, a titular de Mar expuxo as liñas estratéxicas das actuacións previstas no bordo portuario de Palmeira.
O proxecto prevé a reordenación do tráfico e do estacionamento na zona, a recuperación do vínculo co mar e a planificación e deseño do espazo público. Con estas medidas contribúese a eliminar barreiras visuais que impiden gozar plenamente da paisaxe mariñeira e achégase a vila ao mar, para o desfrute de veciños e visitantes de xeito compatible coa actividade portuaria.
