Ribeira, 24 de novembro do 2020 – A subdelegada do Goberno da Coruña, Pilar López-Rioboo; o alcalde de Ribeira, Manuel Ruíz Rivas; e o xefe superior de Policía de Galicia, José Luis Balseiro; abordaron nunha reunión a situación da seguridade cidadá en Ribeira.
O encontro foi solicitado polo alcalde, atendendo a unha petición aprobada polo pleno do concello na que se manifestaba a preocupación sobre a situación de inseguridade no municipio. Fronte a esta petición o xefe superior de Policía de Galicia confirmou que os índices de criminalidade teñen remitido de maneira importante en aspectos como o delitos contra o patrimonio e os furtos, ademais de rexistrarse un descenso considerable no número de lesións.
Tamén mostrou a súa confianza en que a entrada en funcionamento da nova Comisaría da Policía Nacional permita un maior aproveitamento dos recursos existentes. Tamén entende que o uso das tecnoloxías así o permitirá xa que ao dispoñer dun maior número de cámaras e sensores poderase reordenar o número de axentes, detraendo policías das tarefas propias de custodia e vixilancia.
Pola súa banda, Pilar López-Rioboo subliñou o compromiso do Goberno para traballar no incremento da plantilla da Policía Nacional, que na actualidade conta con 52 efectivos, recuperando así a pérdida producida desde o ano 2011 ata o 2018. Neste sentido, o alcalde foi informado que xa está publicada a vacante da praza de inspector xefe da comisaría, que se espera cubrir nos próximos meses.
O alcalde recoñeceu a eficacia policial pero mostrou a súa especial preocupación polos delitos relacionados co tráfico de drogas e solicitou que se intensifique a acción neste ámbito á vez que pediu tamén un reforzo da Policía Científica.
Tanto a subdelegada do Goberno como o alcalde e o xefe superior da Policía Nacional coincidiron en manifestar a intención común de seguir traballando para mellorar a seguridade e para manter a mellor das colaboracións e coordinacións.
