Bisbarra, 11 de xaneiro do 2024 – A aseguradora do buque que provocou o vertido de pellets falou con distintos concellos para facerse cargo da limpeza ou dos custos da mesma.
Non hai sen embargo un protocolo establecido. Lindeiros falou con distintos alcaldes e a situación é distinta en cada caso. A rexedora de Muros, María Lago, explica que foi a aseguradora a que se puxo en contacto con eles e que chegaron a un acordo de xeito moi sinxelo
Lago recoñece que se sorprendeu do rápido que foi todo e tamén de que só sucedera en Muros, polos menos ata onde ela sabía
Preguntamos tamén á alcaldesa do feito de que acaba de tomar posesión do cargo e tense que enfrontar a esta crise. María Lago é consciente de que nos concellos pequenos hai que traballar arreo para superar a falta de recursos.
Onte mesmo os responsables que controlan os traballos comunicábanlle que antes da fin de semana contratarían a máis persoal xa que non era suficiente o que tiñan.
En Porto do Son o concello falou co avogado da compañía que foi que contratou á empresa Ardentía Marine, especializada en salvamento marítimo, para a limpeza das praias nas que traballan desde hai días.
En Ribeira o contacto co concello foi por medio dun correo electrónico e na actualidade están establecendo os parámetros da colaboración. Ribeira conta cunha brigada de emerxencias que é a que se está facendo cargo da situación e mesmo controla a costa con drons para alertar da chegada de máis contaminación.
Lindeiros púxose en contacto, a última hora da tarde de este mércores, coa Xunta de Galicia para coñecer si tamén se traballa coa aseguradora para establecer un protocolo unificado e estamos agardando a resposta.
Manifestación en “Defensa do mar”
Unha manchea de organizacións profesionais do sector do mar das rías de Arousa e Muros-Noia xunto con entidades ecoloxistas vimos de convocar unha manifestación en Compostela para o vindeiro 21 de xaneiro.
A manifestación sairá as doce do mediodía da Alameda de Compostela para chegar sobre as dúas e media ao Obradoiro. Os colectivos que asinan a convocatoria denuncian que “a tardanza e o desleixo das administración en facer fronte a esta ameaza”.
Explican que “Novamente, como xa acontecera na catástrofe do Prestige, tiveron que ser os colectivos cidadás e as persoas voluntarias as que en ausencia das institucións saímos ás costas a loitar contra esta marea plástica”.
Os colectivos denuncian así mesmo “a impunidade con que milleiros de toneladas de materiais tóxicos circulan todos os anos diante das costas galegas e a práctica indefensión do noso litoral fronte aos riscos derivados deste tráfico”
Piden tamén á Xunta de Galicia que se publique no DOGA un plano urxente de actuación que inclúa un studo interdisciplinar, independente e integral; un plan de rexeneración dotado economicamente; unha regulación e publicidade do protocolo de desencoros; garantía de cobertura a TODO o sector do mar mentres se manteña o cese de actividade; un plano de actuación contra as verteduras ao mar e aos ríos e o control sanitario das importacións de marisco.
