Trazo, 19 de decembro do 2018 – O BNG de Trazo volveu levar a pleno unha moción reclamando unha baixada do IBI co fin de mitigar a reforma do catastro.
Os nacionalistas lembran que en xuño do 2016 presentaron unha moción con dúas intencións moi definidas. A primeira que o concello instara ao goberno central a frear a revisión catastral. Por outra banda modificar a ordenanza municipal para rebaixar o tipo de gravamen e aplicar bonificacións ao IBI.
Os nacionalistas decidiron volver a presentar unha moción sobre o IBI dada a preocupación trasladada pola veciñanza. En ela solicitan por unha banda a rebaixa dos tipos de gravame en zona urbana ao 0,40% e en zona rural ao 0,30%, os mínimos que establece a lei (actualmente está no 0,47%). Por outra parte que se apliquen as bonificacións que contempla a lei, especialmente a do 95% máximo que se lle poden aplicar ás construcións ligadas a unha actividade gandeira ou agraria e a do 90% ás construcións situadas en núcleos eminentemente rurais.
Finalmente a moción foi denegada polo Partido Popular, quen dixo “nós estamos aquí para axudarlle á xente e non ir en contra dela, por iso imos votar en contra da moción”, feito que foi retrucado polo concelleiro do BNG Martín Rei: “como podedes dicir que estades aquí para axudarlle á xente cando votades en contra de baixar o IBI, quen se vai crer iso?”. A parte disto o PSOE apoiou favorablemente a moción.