Bisbarra, 10 de novembro do 2023 – Unha das iniciativas máis destacadas da bisbarra, o DesOrdes Creativas, crece para chegar a máis concellos e converterse en Xeosdestino Mural.
A Mancomunidade de Ordes, en colaboración coa Deputación da Coruña e o proxecto Desordes Creativas é a responsable de esta primeira edición a través da cal sumará catro novos murais ao patrimonio artístico da comarca, así como faladoiros, roteiros e a creación dun amplo folleto informativo.
As intervencións levaranse a cabo nos concellos de Frades, Mesía, Oroso e Trazo durante os meses de novembro e decembro. Serán varios os artistas responsables de executar as obras, sempre baixo o comisariado e dirección do estudio Mutante Creativo, creadores e directores do proxecto ‘DesOrdes Creativas’.
Desde a Mancomunidade informan que ao longo das vindeiras semanas ampliarase a información sobre o proxecto, debido ao condicionante da meteoroloxía para a execución desta tipoloxía de actividades no exterior.
