Compostela, 16 de abril do 2024 – A Real Filharmonía de Galicia ofrecerá este xoves un concerto baixo o título de “A cor da memoria” co virtuoso chinés Wu Wei e o sheng como protagonistas.
O sheng é un instrumento chinés de máis de 3.000 anos de antigüidade. Trátase dunha harmónica formada a partir de canas de bambú e pechada nun recipiente de metal e, suponse, que soa como o canto da ave Fénix dunha lenda chinesa: prateado e fugaz coma o vento.
Un instrumento tan especial require tamén dun artistas único como Wu Wei. Un virtuoso que colaborou con distintas orquestras, como a Filharmónica de Berlín, a Filharmónica de Nova York, a Filharmónica de Seoul e a Filharmónica de Los Angeles, entre outras. Alguén capaz de tirar partido do sheng, un instrumento que ofrece infinitas posibilidade en termos de melodía, harmonía, ritmo e polifonía.
A Real Filharmonía de Galicia contará co seu director titular, Baldur Brönimann. O programa inclúe dúas estreas: Ecos vermellos e A cor amarela para sheng e orquestra, sendo a primeira unha co-encarga da RFG e a Euskadiko Orkestra.
Na segunda parte do concerto o público terá a oportunidade de escoitar O paxaro de lume, do compositor ruso Igor Stravinski. Os concertos terán lugar o mércores 17 de abril en Vigo (Teatro Afundación, 20:00 h) e o xoves 18 en Santiago (Auditorio de Galicia, 20:30 h).
Antes do recital de Santiago, ás 19:45h, o público poderá escoitar as impresións e valoracións acerca das obras da man do director Baldur Brönnimann e do solista Wu Wei nunha nova cita do ciclo ‘Conversando con…’.
Entradas á venda
As entradas para o concerto de Santiago poden mercarse no despacho de billetes da Zona C ou na web de Compostela Cultura a un prezo de 18€. Por outra banda, para o espectáculo que terá lugar en Vigo, as entradas estarán dispoñibles a través da plataforma Ataquilla desde os 11,70€.
