O Pino, 24 de xuño do 2021 – O Grupo Municipal Socialista do Pino vén de rexistrar unha iniciativa solicitando a construción dunha área de servizos para autocaravanas.
Os socialistas explican que o turismo de autocaravanas conta cada vez con máis seguidores. Engande que “tras a pandemia colleu máis impulso, cremos que o termo municipal do Pino, con un amplo trazado do Camiño Francés, debe ofrecer este tipo de infraestrutura para todos aqueles turistas e peregrinos que optan por esta maneira de viaxar”.
Así mesmo, están convencidos que brindar este servizo aos visitantes podería servir como reclamo para incentivar a economía local, “o turismo relacionado co Camiño de Santiago é unha das principais fontes de riqueza do noso concello, e temos o deber de coidalo e potencialo xa que o visitante que durme aquí, sempre gasta algo aquí”, manifestan.
Custo do proxecto 50.000€
O Psoe calcula que o investimento necesario estaría próximo aos 50.000€. Propoñen que o financiamento xurda dun convenio de colaboración entre a Axencia de Turismo de Galicia e o Concello de O Pino co fin de mellorar as infraestruturas turísticas do termo municipal.
Esta iniciativa, dos Socialistas, será sometida a debate e posterior votación na sesión plenaria ordinaria a celebrar o vindeiro 30 de xuño de 2021.
