Ames, 20 de decembro do 2021 – O Auditorio de Bertamiráns acolleu a presentación da programación cultural de Ames para o primeiro semestre do 2022.
A Concellaría de Cultura presentou as dezaseis representacións de teatro, danza e novo circo programadas para a primeira parte do ano. O itinerario desenvolverase equitativamente nos auditorios das Casas da Cultura de Bertamiráns e do Milladoiro, cun investimento duns 60 mil euros en contratacións realizados en conxunto coa Axencia Galega de Industrias Culturais (AGADIC).
As entradas poderán adquirirse de maneira individual a partir do 5 de xaneiro, dende a billeteira electrónica do Concello. Ademais, haberá descontos para varios colectivos e “abonos culturais”, que dende o 20 de decembro poderán obterse na billeteira para acudir aos espectáculos para adultos cun 50% de desconto. A programación pode consultarse integramente premendo neste enlace.
No acto interviron a concelleira de Cultura, Natividade González; Jacobo Sutil, director da Axencia Galega de Industrias Culturais (AGADIC), e a técnica do departamento de Cultura, María Vázquez.
Tamén participou parte do persoal e do elenco artístico das diferentes compañías que compoñen a oferta. Luma Gómez, de “Gloria Nacional”, de Teatro do Noroeste; Victor Mosqueira, de “Estrela do Día”, de Producións Teatrais Excéntricas; Rubén Porto e Roberto Leal, de “O Mozo da Última Fila”, de Redrum Teatro; Carlos Carbonel, de Crémilo Proyectos Culturales; Fran Sieira, de “DeMente”, da compañía de danza Fran Sieira; Marta Alonso, de “Bailar Agora”, da compañía de danza Marta Alonso Tejada Traspediante; Carmen Facorro, de Amorodio Teatro, e Gustavo del Río, de Os Náufragos foron algúns dos presentes no acto.
A concelleira de Cultura, Natividade González, remarcou o compromiso de Ames coa cultura, “un ben esencial” polo que mantiveron a aposta durante a pandemia. “Ames medra coa cultura. A pesar das dificultades dos últimos dous anos, reprogramamos o 100% da nosa programación. Fomos capaces de reinventarnos e de sermos sensibles coas necesidades da nosa veciñanza”.
González anunciou prezos reducidos nas entradas para certos colectivos, e gabou a relación que mantén o concello coas compañías de artes escénicas e o tecido cultural galego. A concelleira de Cultura agradeceu por último a colaboración con AGADIC, que considera “chave” para mellorar a oferta cultural para a veciñanza amesá.
Jacobo Sutil, director de AGADIC, quixo felicitar ao concello pola calidade da súa programación, e agradeceu o traballo conxunto realizado para que a cultura continuase durante a pandemia. “Os concellos demostraron durante todos estes meses o seu compromiso por non parar a cultura. Esta programación é moi completa, con teatro, danza e novo circo, para todos os públicos. Non podo máis que darlle os parabéns ao Concello, e mais coa representación que temos aquí de artistas galegos. A Xunta e os concellos somos socios, e seguiremos traballando xuntos”.
A técnica do departamento de Cultura, María Vázquez, foi a encargada de expoñer os criterios de programación, que busca atraer ao máximo público posible aos dous núcleos urbanos principais de Ames. “Decidimos concentrar a programación de artes escénicas nos meses de xaneiro ata maio, xa que no segundo semestre xa contamos con festivais de cine e de maxia. Intentamos abarcar distintas disciplinas e intercalar a programación entre Bertamiráns e o Milladoiro, iso si, sempre tendo en conta que as propostas se adapten ao espazo”. Vázquez destacou ademais o compromiso de Ames coas compañías galegas, tanto consolidadas como de nova creación, así como coas obras “atractivas, con valores sociais, culturais, lingüísticos ou de xénero”.
Artes escénicas para a cativada e as familias
A programación de artes escénicas para o público miúdo e familiar da primeira metade de 2022 inclúe catro obras teatrais, con diferentes idades recomendadas e con presenza de xéneros como o teatro contemporáneo, o musical ou o de monicreques. Este último é o caso da primeira representación do semestre, “Ás para Álex”, que terá lugar o venres 11 de febreiro, ás 18:00 horas, na Casa da Cultura do Milladoiro. Pensada para o público familiar e para a cativada a partir dos 5 anos, a obra da compañía Baobab Teatro conta a historia de Álex, un neno de 8 anos apaixonado ao fútbol que de súpeto non pode camiñar. Álex está anoxado co mundo ata que aparece Laura, que comeza a mudar a mirada que ten o rapaz do que lle rodea.
Xa en marzo será a quenda de “Asdomare”, un espectáculo de narración oral e música a cargo da compañía encabezada pola parella Vero Rilo e Sonsoles Penadique. Asdomare son as mulleres do mar, ou o mar de mulleres, todo o que o mar quita e deixa. A proposta de teatro musical, recomendada para rapazada dos 6 aos 10 anos, terá lugar na Casa da Cultura de Bertamiráns, o venres 18 de marzo, ás 18:00 horas.
O seguinte venres volverá o teatro ao Milladoiro, coa representación de “Aibō”, a ópera prima da compañía Eléctrica, con Iria Pinheiro e Areta Bolado. “Aibō” (compañeira ou compañeiro en xaponés) é a palabra empregada para definir esta fábula, inspirada na Carapuchiña Vermella, que trata de dar unha visión en positivo sobre a nosa relación coa natureza. Orientada á cativada dos 3 aos 6 anos e ao público familiar, a obra representarase o venres 25 de marzo, ás 18:00 horas, na Casa da Cultura do Milladoiro.
A última proposta do semestre para o público miúdo e familiar será “Hugo”, da compañía Os Náufragos, que actuará o venres 1 de abril, ás 18:00 horas, nesta ocasión na Casa da Cultura de Bertamiráns. Hugo é un rapaz con TEA (trastorno do espectro autista) ao que lle gustan os avións e o piano. A obra, dirixida á rapazada dos 4 aos 10 anos, fala da empatía e da beleza da diversidade.
Ata doce propostas para o público adulto
Pola súa parte, a programación orientada ao público adulto dobra as súas propostas para o primeiro semestre de 2022, con doce propostas polas seis do ano anterior. O itinerario inclúe oferta de danza tradicional e contemporánea, espectáculos de novo circo, teatro dramático e contemporáneo, mais sobre todo é a comedia o xénero con maior presenza, con ata sete representacións deste tipo na primeira metade de ano.
É precisamente con comedia co que abre a programación para adultos, con tres obras deste xénero no mes de xaneiro. A primeira delas é “Gloria Nacional”, que conta a historia de Uxío Rodas, un escultor e pintor de gran repercusión no seu país ao que o seu presidente lle pide unha gran escultura monumental que represente á súa nación. Dirixida pola compañía Teatro do Nordeste, a representación será o venres 14 de xaneiro, ás 20:30 horas, na Casa da Cultura de Bertamiráns.
Unha semana despois, o venres 21, tamén na Casa da Cultura de Bertamiráns, a compañía Producións Teatrais Excéntricas presentará a comedia “Estrela do Día”, ás 20:30 horas. Tratarase dunha experiencia para que o público recupere a “fe” no teatro, a través de milagres, da inxenuidade e da nova inocencia.
Para pechar o mes de xaneiro, o venres 28 ás 20:30 horas a compañía Redrum Teatro leva á Casa da Cultura do Milladoiro “O mozo da última fila”, unha comedia que se centra en Claudio, un estudante de dezasete anos que non soporta as clases, e en Xermán, o seu profesor de Lingua e Literatura, co que empeza a compartir relatos a raíz dunha redacción sobre unha fin de semana.
Xa en febreiro, o itinerario seguirá con “Drop”, da compañía Pistacatro. Recomendada tamén para a rapazada a partir de 10 anos, “Drop” é un espectáculo de novo circo, con teatro, música en directo e malabares, chaves na obra para facer unha comparación coa vida e os equilibrios que todos e todas facemos en certos momentos. Será o venres 4 de febreiro, ás 20:30 horas, na Casa da Cultura do Milladoiro.
“A parábola do angazo” será a seguinte representación do programa, o venres 11 de febreiro ás 20:30 horas, na Casa da Cultura de Bertamiráns. A compañía Talía Teatro conta, a través da comedia, a historia dun mozo dunha aldea galega que esquece a súa lingua ao emigrar uns meses a Castela. Partindo dunha lenda xa recollida polo Padre Sarmiento no século XVII, a obra busca mostrar a capacidade de resistencia do galego.
O venres 18 de febreiro, ás 20:30 horas, é a quenda de “Libre como os paxaros”, na Casa da Cultura do Milladoiro. O drama da compañía Teatro do Atlántico ten á actriz María Barcala representando o papel dunha muller escritora e poetisa, comprometida coa cultura do seu pobo, que reflicte e denuncia a situación das mulleres, a emigración masiva, a fame e a miseria: María Rosalía Rita de Castro.
No mes de marzo celebraranse tres obras máis. O venres 11 de marzo, ás 20:30 horas na Casa da Cultura de Bertamiráns, a compañía A Quinta do Cuadrante representará “A Lúa vai encuberta”, un texto orixinal de Manuel María arredor da realidade galega e da loita por conformar unha identidade propia.
O 18 de marzo volve a comedia coa produción da compañía A Panadaría, “As que limpan”. Será na Casa da Cultura do Milladoiro, ás 20:30 horas. A obra pon o seu foco nas camareiras de piso dos hoteis, e na súa loita por conseguir uns dereitos laborais e sociais xustos.
A terceira e última representación do mes de marzo será “GOLFA”, unha comedia transmedia sobre a sexualidade dende as artes escénicas. As compañías Crémilo Proxectos Culturais e Dist. Espectáculos levan esta peza á Casa da Cultura de Bertamiráns o venres 25 de marzo, ás 20:30 horas.
O mes de abril estará dedicado á danza, con dous espectáculos na Casa da Cultura do Milladoiro. O primeiro será “DeMente”, o venres 1 de abril ás 20:30 horas. Será unha sesión de danza tradicional da compañía Fran Sierra, que tratará de mostrar o estigma que sofren e sufriron as persoas que padecen trastornos mentais, dende os amoreamentos carcerarios ata a a exteriorización dos nosos días.
A segunda proposta de danza será o venres 22 de abril ás 20:30 horas, con “Bailar agora”, un espectáculo de danza contemporánea da compañía Marta Alonso Tejada Traspediante. “Bailar agora” é un impulso por situarnos no tempo actual das cousas, con plena consciencia sobre o aquí e o agora do que facemos e de como vivimos.
A derradeira obra da programación cultural de artes escénicas do primeiro semestre de 2022 será “Reino da Extinción”, da compañía Amorodio Teatro. “Reino da Extinción” é unha comedia que conta a historia de catro persoas galegas de diferentes etapas históricas, que son forzadas a convivir nun Alén moi distinto do que imaxinaban, poñendo a proba as ideas do público sobre que é ser galego, vivir en Galicia ou falar a nosa lingua. A representación terá lugar o venres 6 de maio, ás 20:30 horas, na Casa da Cultura de Bertamiráns.