Compostela, 30 de decembro do 2022 – Xosé Antón Cascudo ven de gañar o XXII Premio Ramón Piñeiro de ensaio polo traballo “A mística da feminidade en Mad Men”.
O xurado valorou en A mística da feminidade en Mad Men a súa aposta polo ensaio desde a análise semiótica do audiovisual máis icónico, no que se estuda a cuestión de xénero integrando na revisión o mellor das análises e do pensamento sobre o tema.
O Ramón Piñeiro está organizado conxuntamente pola Xunta de Galicia, a través do Centro Ramón Piñeiro para a Investigación en Humanidades, e a Editorial Galaxia. O secretario xeral de Política Lingüística, Valentín García, e Marcos Calveiro, director da editorial, participaron na reunión do xurado que decidiu o gañador. O premio está dotado con 3.000 euros e coa publicación en Galaxia durante o próximo ano.
Escrito cun estilo ensaístico moi ben perfilado, o ensaio achega unha proposta que conecta co máis destacado dos estudos internacionais neste ámbito, reflexionando sobre a construción do socioidentitario a través dunha das series máis recoñecidas e influíntes do noso tempo.
Os integrantes do xurado salientaron, así mesmo, a variedade e o interese do conxunto de traballos presentados a concurso, o que amosa a vitalidade do xénero ensaístico en Galicia e a solidez da traxectoria deste certame, polo que levan apostando desde hai máis de dúas décadas a Editorial Galaxia e o Goberno galego.
O autor do ensaio, Xosé Antón Cascudo (Guitiriz, 1976) é profesor de Xornalismo na Universidade de Santiago de Compostela, ademais de poeta (publicou en 2007 Manual do misántropo en Espiral Maior) e director de documentais. Licenciado en Historia da Arte, é tamén doutor en Filosofía e un dos máis estimados estudosos galegos do eido audiovisual.
