Bisbarra, 29 de abril do 2021 – O persoal que atende o Servizo de Axuda no Fogar en Frades e Ordes apoia a petición de CCOO de declarar nula a adxudicación.
Comisións Obreiras, co apoio dos traballadores, pedirá que Frades e Ordes adxudiquen de novo o servizo. Solicitarán tamén a subrogación dos 46 empregados pola nova empresa.
Sentenza en contra da empresa
O conflito no Servizo de Axuda ao Fogar de Frades e Ordes nace da denuncia presentada por CCOO polos incumprimentos laborais da empresa Aralia. Hai un mes o Xulgado do Social n.º 3 da Coruña emitía unha sentenza na que constata eses incumprimentos.
O xulgado considera que a empresa Aralia non respecta a xornada mínima de 25 horas para o persoal que non goza de xornada completa, 24 no caso do persoal que traballa as fins de semana e os festivos. Tampouco cumpre co descanso mínimo entre xornadas de traballo, doce horas, e semanal, día e medio ininterrompidos. Ademais, a sentenza declara o dereito das traballadoras a cobraren os seus salarios conforme o recollido no convenio sectorial.
Denuncias previas
O sindicato Comisións Obreiras xa denunciara á concesionaria do SAF de Frades e Ordes antes de levar o tema ao xulgado. CCOO realizou actuacións ante a inspección de traballo e mesmo reuniuse coa dirección da empresa. Aralia continuou cos incumprimentos como se constatou en distintas actas sancionadoras da inspección de traballo.
