Compostela, 13 de xaneiro do 2017 – O xogador do Rio Natura Monbus Obradoiro, Pepe Pozas, alcanzou no encontro co equipo ante o FC Barcelona Lassa, unha importante cifra como profesional: 100 partidos xogados na liga Endesa.
Pozas confesou sentirse “moi contento e orgulloso de poder alcanzar esta cifra por todo o traballo e, tamén, pola dificultade que hai a día de hoxe de ter oco para os xogadores nacionais. Seguirei traballando duramente para que sexan, como mínimo, 100 máis”.
O base comentou que “faime moi feliz poder alcanzar 100 partidos estando no Rio Natura Monbus Obradoiro e poder logralo ademais sendo o capitán, co que iso significa. O Obra é a miña familia e é a miña casa”.
O xogador explicou que cando comezou a xogar a baloncesto hai uns anos “para min era imposible pensar que en 2017 cumpriría o meu partido número 100”. Desde o seu debut ata o seu último partido, Pozas detallou que foi unha etapa “moi gratificante, non só profesionalmente, se non tamén persoal. Debutei en Málaga hai moitos anos e tiven a sorte de coincidir cunha chea de xente que me achegou cousas e espero poder continuar igual”.
De fronte ao papel da afección no partido do próximo domingo, o capitán asegurou que “á nosa afección non temos que pedirlle nada. Eles saben que o domingo lles necesitamos. O único que temos que facer é darlle o mellor de nós porque eles xa saben o que necesitamos en cada momento e demóstrannolo en todos os partidos. Oxalá o partido do domingo sexa unha festa que culminemos con vitoria”.
