Ames, 9 de febreiro do 2022 – Talía Teatro leva este venres á Casa da Cultura de Bertamiráns, en Ames, a peza A parábola do angazo.
Nesta peza, a compañía Talía Teatro conta, a través da comedia, a historia dun mozo dunha aldea galega que esquece a súa lingua ao emigrar uns meses a Castela. A cita coa Parábola do angazo a partir das oito e media da tarde.As entradas están xa á venda na Billeteira electrónica do Concello de Ames.
A parábola do angazo e a resistencia do galego
Esta obra é unha viaxe pola historia do galego e por algunhas das súas anécdotas máis significativas, fiada por unha coñecida lenda xa recollida polo Padre Sarmiento no século XVII. Este relato popular conta como un mozo dunha aldea esquece o galego ao emigrar uns poucos meses a Castela e volver posteriormente á súa terra.
A través do humor e do diálogo, os dous intérpretes unirán pasado, presente e futuro para demostrar que a lingua galega sobreviviu xa a moitas situacións adversas, e que aínda ten moito que dicir, invitando aos espectadores á reflexión e a ver perspectivas distintas sobre o estado do galego.
A obra foi estreada na 30º edición do FIOT Carballo, celebrado a finais de 2021, como parte da sección “Noites de Rúa Chea”. “A parábola do angazo” serve como peche dunha triloxía iniciada por “Bicos con lingua” (2003) e “Pelos na lingua” (2011), propostas anteriores da compañía.
O programa completo de cultura de Ames do primeiro semestre de 2022, elaborado pola Concellaría de Cultura en conxunto coa Axencia Galega de Industrias Culturais (AGADIC), pode consultarse ao completo premendo nesta ligazón.
