Bisbarra, 7 de maio do 2024 – A capital do Sar crea Padrón Literario co gallo das Letras Galegas e a colaboración da Fundación Pública Galega Camilo José Cela, da Fundación Rosalía de Castro e da Xunta de Galicia.
O obxectivo de Padrón Literario é “inspirar ás xeracións futuras e impulsalas a explorar o mundo a través da palabra escrita”. Unha intención que se concreta nunha programación que inclúe obradoiros escolares, teatro, concertos, e tributos aos autores da vila e a homenaxeada este ano nas Letras Galegas: Luísa Villalta.
As propostas comezarán este venres, día 10, cunha ofrenda floral a Camilo José Cela no cemiterio de Adina en Iria Flavia. Será a partir das 19.45 horas para a continuación pasar ao paraninfo do Museo Camilo José Cela co monólogo do actor e humorista Carlos Blanco. A entrada é de balde ata completar aforo. Ao mesmo tempo, e dirixida ao público familiar, está prevista a actuación de Inventi Teatro ‘A librería máxica’, na praza de Macías.
Padrón Literario organiza dentro da programación o denominado Letreseo. Desde o día 10 e ata o 20 terá lugar esta Semana das Letras no Museo. Unha semana de portas abertas no Museo Camilo José Cela, en horario de 10 a 14 horas, con actividades como talleres lúdicos da man de Arenaria e a actuación de Pakolas.
O mércores día 15, dende as 20.00 horas, no auditorio da Casa Museo Rosalía de Castro, terá lugar Conversas Nortear ‘Literatura en feminino’. Contará coa participación da historiadora e escritora galega María López Sande, da USC; a ensaísta e investigadora Isabel Cristina Mateus, da Universidade de Minho; e de Anxo Angueira, presidente da Fundación Rosalía e académico da RAG. A entrada é de balde ata completar aforo.
Padrón Literario programa para o venres 17 de maio, tamén na Rosalía de Castro e tamén de balde, a actuación de Lucía Aldao, poeta con máis de 20 anos dedicada ao mundo da poesía escénica, da música e do humor. A cita neste Día das Letras Galegas comeza ás 20.00 horas.
Outro dos momentos clave será o Concerto das Letras Galegas que chega a súa 36ª edición. Dende as 20.00 horas do sábado 18 poderase escoitar no Auditorio Municipal á Coral Polifónica de Padrón, á Coral ‘A Lembranza’ de Sada e á Coral Polifónica Máximo Gorki de Vigo.
O sábado 24 o programa de Padrón Literario volve duplicarse ás 20.00 horas co concerto de Barahúnda, no auditorio da Casa Museo Rosalía, e coa actuación dos Títeres Brincadeira e a obra ‘Luisa Villalta eo violín de vento’, na praza de Macías.
O público familiar será tamén o protagonista da última das actuacións da edición deste ano. A praza de Macías será o escenario o venres 31 de maio, ás 20.00 horas, do espectáculo de Fantoches Baj ‘Isaura e Tristán. Constastorias’, unha enxeñosa peza teatral de monicreques baseada no libro de Luísa Villalta ‘As chaves do tempo’.
