Padrón, 8 de febreiro do 2022 – O creador e director artístico da compañía Pistacatro, Pablo Reboleiro Rama, foi o gañador do XXI Premio de Interpretación Teatral Maruxa Villanueva.
O xurado valorou a traxectoria de Pablo Reboleiro como un dos grandes impulsores da renovación do circo en Galicia e, en especial, o seu papel no espectáculo Drop, “onde exhibe a capacidade de hibridación do circo contemporáneo, botando man da tradición dos malabares á par doutras disciplinas artísticas”.
O xurado, que tomou a decisión por unanimidade, salienta ademais que en Drop, Pablo Reboleiro achega ao público unha reflexión sobre conceptos da vida contemporánea “como reivindicación do erro e a divulgación das matemáticas”.
O multidisciplinar Pablo Reboleiro
Acróbata, malabarista, paiaso, músico, bailarín, actor… Son moitas as definicións que poden aplicárselle na súa faceta artística a Pablo Reboleiro, que se suma na nómina de premiados do Maruxa Villanueva a nomes como os de Roberto Vidal Bolaño, Rosalía Dans, Xosé M. Olveira ‘Pico’, Patricia de Lorenzo, Miguel de Lira ou Rocío González, premiada o pasado ano.
Lorena Couso, concelleira de Cultura de Padrón e presidenta do xurado, destacou a implicación de todos os seus membros para respectar ano tras ano o espírito dos galardóns, que buscan dar a coñecer unha sobresaínte traxectoria dramática e unha actriz ou actor que destacase polo seu bo facer nunha interpretación recente.
Couso Incidiu en que a decisión de outorgarlle o galardón a Pablo Reboleiro tomouse por unanimidade e amosou a súa satisfacción porque recaese nun artista de circo, “unha modalidade que aínda non fora recoñecida”.
Reboleiro recibirá como premio 1.200 euros, un diploma acreditativo e unha figura do busto da actriz Maruxa Villanueva nun acto que terá lugar nos vindeiros meses en Padrón.
O xurado, reunido no centro social do Concello de Padrón, estivo formado ademais de por Lorena Couso polos profesores da Escola Superior de Arte Dramática de Galicia Inma López Silva, Afonso Becerra e Roberto Pascual; o actor e profesor da Universidade da Coruña Carlos Caetano Biscainho Fernández; e a animadora social de Padrón, María Cruz Taboada.