Brión, 14 de xullo do 2021 – Os maiores de Brión que participan nas actividades de reencontro, organizadas polo concello, participaron nun obradoiro de decoración de camisetas.
No primeiro taller previsto os participantes recibiron consellos sobre a memoria, como coidala e como exercitala. En esta nova actividade achegáronse a algo, en principio, afastado das súas aficións e máis vinculado á cultura urbana como a decoración de camisetas.
Durante as dúas horas que durou a actividade os maiores, todos por riba dos sesenta anos, deron renda solta á súa creatividade e estamparon sobre as súas camisetas unha serie de deseños elaborados previamente durante as clases. A maioría dos homes optaron por estampar a cabeza dunha vaca a través dun valado con forma de corazón; mentres que elas repartíronse entre uns deseños florais e un retrato dunha muller de costas.
Estes obradoiros de reencontro son unha iniciativa gratuíta do Concello de Brión para animar a veciñanza de máis idade a retomar as actividades e as relacións que mantiñan antes da Covid-19.
Teñen lugar todos os xoves, en horario de 10:00 a 12:00 horas, no centro social polivalente. As próximas sesións consistirán nun paseo guiado por Pedrouzos (xoves 15), un obradoiro de elaboración de tartas (xoves 22) e unha visita ao Pazo do Faramello (xoves 29).
