Bisbarra, 8 de maio do 2024 – Tras a caída dunha rama dunha árbore que levou ao peche da Carballeira de Santa Minia o concello de Brión inicia unha poda de seguridade.
A poda en Santa Minia é unha das accións acordadas cos técnicos tras a caída de parte dun dos carballos o pasado mércores. O alcalde de Brión, Pablo Lago, explica que “os traballadores do GES de Brión, baixo as indicacións dos técnicos responsables, están a realizar unha poda das copas e das ramas máis elevadas para fortalecer as árbores e evitar novas caídas”.
Uns traballos para os que o GES brionés está a empregar o camión autoescada comprada polo Concello no verán de 2021, que está especialmente preparado para actuacións en altura e é equiparable aos vehículos existentes en calquera parque de bombeiros. A parte principal da poda en Santa Minia rematarase durante esta semana.
Toma de mostras
Os técnicos aproveitarán para tomar mostras dos carballos de Santa Minia, que serán enviadas a un laboratorio para determinar o seu estado sanitario. Estas mostras mandaranse en quendas de 10 en 10. Trátase dun traballo laborioso xa que de cada carballo teñen que tomarse tres mostras: da raíz, da terra e das ramas.
Os resultados das análises que se realicen tardarán en coñecerse un par de meses. Nese momento, o Concello de Brión poderá ter unha visión real e actual do estado sanitario das árbores e tomar a mellor decisión sobre como proceder con elas.
Polo momento a Carballeira de Santa Minia seguirá pechada or seguridade. Habilitáronse camiños seguros para acceder ás instalacións municipais que rodean a carballeira (biblioteca, Casa da Cultura, Aula CeMIT…). Brión procedeu ademais a cambiar de lugar todas as actividades inicialmente previstas na carballeira, como a Andaina Torres de Altamira, que se celebra este sábado e que se trasladou á praza contigua á carballeira, ao pé da rúa Gondar.
Estas análises buscan confirmar ou negar a presenza de Armillaria Mellea nas árbores, unha enfermidade para a que non hai cura posible e que provoca a putrefacción do sistema radicular do carballo e, en consecuencia, a súa morte por inanición ao non poder absorber nin a auga nin os nutrintes do chan. Este fungo xa ocasionou a retirada dunha ducia de carballos e do terreo da zona sur da carballeira, que foi substituído por nova terra e novos exemplares de carballo de 3 metros de alto.
