Ordes, 25 de maio do 2020 – O concello de Ordes mercou recentemente un aparato de desinfección por ozono que, explicaba, era capaz de eliminar en dous minutos todos os patóxenos dun vehículo.
O BNG ven de mostrar a súa preocupación por estas afirmacións xa que o ozono é unha sustancia que non está avaliada pola Axencia Europea de Produtos Químicos, para a desinfección de espazos.
Recomendacións sanitarias en contra
As indicacións da Consellería de Sanidade, do Ministerio de Sanidade, así como do Instituto Galego de Seguridade e Saúde Laboral, son moi claras ao respecto e desaconsellan o uso de este produto e din que “no caso do ozono ou dióxido de cloro, aínda que xa foron avaliadas as súas capacidades como viricidas en determinadas condicións, aínda se está facendo unha avaliación sobre o risco que supón o seu emprego”.
Os nacionalistas din non entender “como o goberno municipal, ignorando ditas recomendacións, decide apostar por este método de desinfección e merca unha máquina xeradora de ozono”.
