Bisbarra, 7 de xullo do 2023 – O BNG de Ordes ven de rexistrar unha solicitude no concello na que demandan información sobre o estado do Plan Xeral de Ordenación Urbana, PXOM.
Na solicitude rexistrada os nacionalistas requiren ademais que lles remitan “comunicacións, requirimentos ou resolucións que puidese efectuar a consellería competente en materia de urbanismo da Xunta de Galiza, en referencia á aprobación provisional do PXOM”.
O portavoz do BNG, Pablo Vidal, manifesta que “a día de hoxe, supéranse amplamente os catro meses desde a aprobación provisional do documento, prazo legal no que a consellería competente debera ter emitido a correspondente resolución”.
Para Vidal non resulta de recibo que “transcorrido este tempo, tanto a veciñanza como a corporación municipal, carezamos por completo de información ao respecto da tramitación do PXOM”
Nese sentido, desde a fronte nacionalista demandan ao alcalde “un exercicio de transparencia, informando axeitadamente á veciñanza sobre o estado no que se atopa a tramitación do PXOM”.
